Daini anhte jawm sumru akyu hpyi na ga-baw hpe: The Faithfulness of God (Karai Kasang a Sadi Dung Ai Lam) ngu nna la da ga ai.
Anhte kam hpa shamyet shanat ai Karai Kasang gaw mai kaja nga ai sha n rai, sadi dung nga ai. Dai hpe Bu Hkkawm Laika hta mu lu ai; daw kaba hkun-masum, kaji shi-jahku (23:19) hpe jawm madat yu ga:
“Karai Kasang masu na gaw, shi masha n rai,
Myit malai lu na gaw masha kasha n rai;
Tsun kau ngut sayang, n shagrin ai nga na a ni?”
Karai Kasang a Sadi Dung ai anhte a makam masha a npawt nhpang rai nga ai. Anhte shi hpe tsawra na, shi a hpang e hkan nang na, shi hte rau hkawm rau shanu nga na, ndai lam ni a matu Shi a Ga kang ra nga ai.
Karai Kasang gaw nang hpe kaja dik ai sak hkrung lam de woi sa lu ai hpe nang shadang tup n kam nit yang gaw, nang shi a myit ra ai lam hpe tam na n rai sai, na a sutgan ni hpe mung shi a lata hta nang ap da na n rai nga ai; shi nang the rau shanu ningngai nga ai hpe mung nang hka sha lu na n rai sai.
Ya anhte na la sai Karai a mungga gaw “shi hkrak sadi dung nga ai, ngang grin ai, tengman ai” ngu ai hpe gasadi jaw da nga ai.
Hpilipi laika, daw kaba langai, kaji kru (1:6) hta mung “nanhte hta e mai kaja ai amu galaw hpang ai wa gaw, Yesu Hkristu a nhtoi du hkra dai hpe shatsup shatup ya na ra ai, ngu nna ngai myit nawn nga nngai law” nga nna Kasa Pawlu tsun da nga ai.
Dai the maren Roma ni kaw shagun dat ai Laika hta mung gasadi jaw da nga ai; daw kaba matsat, kaji hkun-matsat (Roma 8:28):
“Dai rai nna shaket tawn da ai hte maren, shaga la ai hkrum ai ni ngu ai, Karai Kasang hpe tsawra ai ni a matu mara, yawng mayawng mai kaja hkra jawm byin wa sai, anhte chye ga ai.”
Na a Karai Kasang gaw nang hta hkrak sadidung ai. Nang hpa mi galaw ai raitim, na a matu shi nang hte rau rai na ra ai. Shi a sadi dung ai lam gaw nang galaw ai bungli ni hta n hkan ai. Nang kaw na shi ra sharawng ai lam gaw, dai Chyoi Pra ai Wenyi a mai kaja ai apu asi ni hpe shapraw ya mayu ai sharawng ai salum sha rai nga ai.
Dai majaw, Karai Kasang a sadi dung ai lam hpe nang n chye ai sha nga na matu hpan da hkrum ai n re. Na prat a lit la ai lit hpe nang hkrai a atsam the sha gun hpai si nga na hpe Wa Karai n yaw shada da ai.
Shinggyim masha ni gaw shanhte a gasadi ni hpe run na re; Karai Wa gaw shi gasadi hpe galoi n run ai. tinang a dinghku masha ni hte manaw manang ni nang shanhte hpe ra ai aten n nga chye ai, Karai Kasang gaw na a matu galoi mung nga nga ai.
Na a prat hkrunlam gara daw hta nang hkrai rai nga ai ngu nna hkam sha ai kun? Karai Kasang a sadi dung ai lam hpe nnan bai mu mada mayu ai i? Nang nga nga ai shara, masa lam shagu hta shi nang hpe mu mada nga ai tsun da ai: Esaia daw kaba mangashi-mali, kaji shi (54:10) hpe madat yu ga:
“Bum ni sit wa nna, kawng ni htawt mat wa lu timung, nye a n-gaw nwai ai myit nang kaw na sit lu na n rai,
Nye a ngwi pyaw ai ga shaka hpe mung, dawm la lu na n rai,
Nga nna nang hpe matsan dum ai Yaweh Karai Kasang tsun nga ai.”
Sadi dung ai ngu ai gaw Karai Kasang a kyang lai kumla a npawt nhpang rai nga ai. Na ntsa tawn da ai Karai Kasang a tsawra myit gaw nang kabye hkawm sa nga ai aga hta grau ngang kang nga ai.
Dai majaw, Karai Kasang a sadi dung ai hpe bai htan ya u. Nang makawp maga la n lu ai, ngang grin lam n nga ai na a prat daw chyen ni hpe shangang shakang ya na matu shi a gasadi hta ap da u, kam u.
Shinggan de, na makau na mungkan a mbyin masa ni hpe yu dat u; nang grai kam shamyet ai lam ni hpe myit dum dat yu u. Na a myi hte mu lu, na a myit hta hkawn ai lam ni mahkra hta Karai Kasang a ga sadi dung ai lam grau nna grin nga ai hpe dum u.
Na a kraw lawang hta Karai Wa hpe grau tsawra, shi hta grau kam hpa ai myit law jat wa u ga.
Akyu Hpyi Ga
- Karai Kasang a gasadi, nang hta dik wa u ga ngu nna, akyu hpyi u. Shi a gasadi hpe bai dum u.
“Karai Kasang masu na gaw, shi masha n rai,
Myit malai lu na gaw masha kasha n rai;
Tsun kau ngut sayang, n shagrin ai nga na a ni?” (Bu Hkawm 23:19)
- Na prat hpe bai dinglik yu u; gara daw hta n shim ai zawn hkam sha ai kun?
Kaning re ai masa lam ni gaw na a myit masin hpe nbung laru hte hka-leng e gawut shapoi ai hkrum ai zawn nga, hkam sha shangun ai kun? Na a prat gara daw hpe ngang gring nga shangun mayu ai kun?
- Kadau kadap nga hkam sha nga ai na myit masin a jut shara ni hta, Karai Kasang a gasadi grin nga na matu – Chyoi Pra ai Wenyi kaw garum hpyi u.
“Sadi dung nga na” ngu ai shi a gasadi hta kam shamyet lu na atsam Karai Wa kaw hpyi u.
Nang hpe myit n pyaw n ngawn byin shangun ai na prat a daw chyen ni de, simsa ai chyeju hpe gara hku jaw ya na masing nga ai kun ngu nna, Karai Wa hpe san yu u.
Asim sha nga nna shi a nsen hpe madat u.
Nang na lu ai lam ni hpe ka matsing da u.
Akyu hpyi sumru hpawng hta lawm ai ni yawng, Wa Karai a sadi dung ai lam hpe ta-tut hkam la nna ngwi pyaw kabu gara nga mu ga law.
