Myitkyin Saradaw Sasana, Njang Dung Jau Ginwang, Rada Kawng Sara Gaiwang, Rada Kawng hta Karai Kasang a chyeju hte Sara Gaiwang hpung masha ni hte Alu Madu ni jawm shakut let gawgap shangut la lu sai Hkristu Hkawhkam Nawku Htingnu nnan, Lamu Hkawhkam Jan Nu Maria Lungpu nnan hte Chyoi Pra Hkum Nawku nta nnan shaman hpaw poi hpe 10/12/2025 ya shani jahpawt hkying 10:00am hta galaw la lu sai.
Ndai Hkristu Hkawhkam Nawku Htingnu nnan, Lamu Hkawhkam Jan Nu Maria Lungpu nnan hte Chyoi Pra Hkum Nawku nta nnan shaman hpaw poi hta Lit Hkam Wa Saradaw John Mung Ngawn La Sam a malai Wa Saradaw Francis Daw Tang (Hkringsa) hte Wa Jau ni marai (35) ni kaw nna shanglawm hpaw shaman ya lai wa ai.
Ndau poi hta wu hpung shagu na Mama ni, Brother ni, Tara Hkaw Sara/num ni, alu madu ni hte nawku hpung masha 1000 jan sa du kabu shanglawm akyu chyeju hkam la lai wa sai.
Hkristu Hkawhkam Nawku Htingnu, Lamu Hkawhkam Jan Maria Lungpu hte Chyoi Pra Hkum Nawku Nta hpe Njang Dung Jau Ginwang up Wa Jau Patrick Zinwa Brang Di lam woi matsun n gun jaw ai hte rau lit hkam sara hte hpung masha ni alu madu ni shakut let (3) ning lapran shangut la lu ai lam mung chye lu ai.
Rada Kawng Sara gaiwang gaw Myitkyina Jau ginwang naw rai nga ai ten hta Njang Dung Sara Gaiwang kaw nna 18/9/2018 ning hta Rada Kawng sara gaiwang nnan langai hku nna Myitkyina Jau ginwang up, Wa Jau Dr.Peter Hka Awng Tu (VG) kaw shaman ya sai hte Hkrsitu Hkawhkam a mying shing teng hpe masat shagrin ya sai re .
Rada Kawng sara gaiwang hta Rada Kawng (A), Rada Kawng (B), Hti Win, Ngaw Chang hte Charapati (B) mare ni shanglawm nna hpung htinggaw (276) nga nna hpung masha -1002 nga ai lam Rada Kawng lit hkam Tara Hkaw Sara Kaba Bosco Dalam Htum Zau Doi tsun ai hku nna chye lu ai.
