Daini gaw God Our Great Deliverer (Karai Kasang Anhte a Hkihkam ai Hkyela Madu) ngu ai ga-baw hte bai akyu hpyi sumru yu na matu saw shaga dat nngai.
Bawng dung ai ni hte shi a Amyusha ni hpe hkye mawai la na atsam Karai kasang hta nga ai lam hpe jawm sumru yu na ga ai.Ndai ga-baw hte lakap nna, Shakawn Kungdawn Laika, daw kaba sumshi-lahkawng, kaji sanit (32:7) hpe shawng madat yu ga.
“Nang gaw nye a makoi magap shara rai nga ndai,
Ru tsang ai lawt u ga, nang ngai hpe sin nga ndai:
Padang nlaw mahkawn ga hte nang ngai hpe kawan da ni ai.”
Karai Kasang gaw, Daniela hpe matse ai hkanghkyi ni a n-gup kaw na hkye la sai.
Dawi hpe shi hpe hkan shachyut gyam ai ni a lata na shi hpe makawp maga la sai.
Israela amyusha ni hpe Egutu hkawhkam a lata kaw na mawai la sai.
Si mat nna lup e mali ya rawng nga sai Lazaru hpe si ai kaw na bai jahkrung sharawt la sai.
Dai the maren, mungkan e anhte hpe jahten shaza kau na matu hkyen tawn ai mahkam ni hte masing ni kaw na Karai Wa mawai la na rai nga ai.Samuela Laika Lahkawng, daw kaba hkun-lahkawng, kaji lahkawng kaw nna mali (2 Samuela 22:2-4) hta Dawi hkawhkam mahkawn ai gaw:
“Yahwe gaw kaja wa, nye a lunghkrung,
Nye a bunghku, nye a hkye la ai wa rai nga ai.
Karai Wa, nye alunghkrung,
Shi hta ngai shingbyi nga nngai;
Nye a n-gang, ngai hpe hkye la ai nrung,
Nye a langchyi, ngai shingbyi shara:
Nye a hkye la ai Madu e, adip arip kaw na
Nang ngai hpe hkye la nit dai.
Shakawn mai ai Yahwe hpe ngai shaga nna,
Gumlau ni a lata na hkye la ai hkrum ni ai.
Anhte Karai Wa kaw hpyi jahtau yang, shi gaw, n-gun atsam hte, mau na zawn, hkum tsup dik ai hku bungli galaw nga ai. Anhte hpe hkye mawai la na matu kaning re ai amu, masing hpe raitim, hpring tsup ai hku galaw nga ai.
Shut hpyit mara, li ana, masu magaw, maw sha hkrum ai, zingri zingrat ni hpe nang hkrum wa ai shaloi, Karai Wa gaw nang hpe garum na shajin da nga ai.
Shi gaw atsam kaba rawng nna tsawra chye ai, mauhpa Wa rai nna kaja wa nga nga ai.
Shi gaw Hkawhkam kaba hte shangun ma mung rai nga ai. Nang hta ra kadawn nga ai lam ni hpe shi mu chye nna, dai hta nang hte hkrum na hpe ra sharawng nga ai.
Daini, nang hpang de kaning re ai hpyen ni du a ta?
Kaning re ai pu ba lam ni, aten masa, machyi makaw, shing n rai, mara ni, nang hpe gyit gamyet da nga ai kun? Karai Wa gaw nang hpe tsun nga ai:
“Ngai hta shi kanan nang nga ai majaw,
Ngai shi hpe mawai la na we ai;
Nye a amying hpe chye nga ai majaw,
Ngai shi hpe makawp maga na we ai.
Shi ngai hpe shaga yang,
Ngai htan na nngai,
Rutsang ai the ngai shi the rau nga na nngai;
Ngai shi hpe sai la nna, shagrau na we ai.
Prat galu ai hte Ngai shi hpe shakat ya nna,
Nye a hkye hkrang la ai lam, shi hpe madun dan na we ai.”
(Shakawn Kungdawn 91:14-16)
Dai gaw, mauhpa hte hkam dahka jaw ai gasadi rai nga ai.
Dai majaw, sumsing lamu na na Kawa a lata hpe lashum manat da u. Myit kaji let na baw hpe hkum gum da.
Shi a Mying hpe kamhpa let shaga u. Nang jan rai tsap lu na atsam hpe shi kaw hpyi u.
Shi gaw, shi hte nang, na a shingran pandung a lapran na Yeriko mare shakum hpe hpya kau ya mayu nga ai. Dai hpe Shakawn Kungdawn daw kaba sumshi-lahkawng, kaji sanit (32:7) hta tsun da nga ai:
“Nang gaw nye a makoi magap shara rai nga ndai,
Ru tsang ai lawt u ga, nang ngai hpe sin nga ndai:
Padang nlaw mahkawn ga hte nang ngai hpe kawan da ni ai.”
Nang mahtang, myit galu ai the shi a jahtau nseng hpe madat let, shi hpang de hkan nang lu na kun?
Akyu Hpyi Ga
- Na a shawng e pat shingdang ai lam yawng hpe yenseng kau na mayu ai myit hte atsam, Karai Wa kaw nga ai hpe myit dum u. Shakawn Kungdawn Laika daw kaba sumshi-mali, kaji shi-sanit the shi-matsat (34:17-18) hta ningnga ka da ai:
“Dinghpring ai ni jahtau yang Yahwe madat nga nna,
Ru tsang ai nlang hta na, shanhte hpe mawai la wu ai.
Yahwe gaw myit maku daw ai ni hte ani sha rai nga ai rai nna,
Wenyi htum ai ni hpe hkye la mu ai.”
- Na a prat hpe bai nhtang dinglik myit yu u. Gara shara hta hkye mawai ai hpe ra nga ai kun? Chyoi Pra ai Wenyi kaw myit jahtoi ya ai chyeju hpyi u.
- Karai Wa a shingkang man e asim sha dung let, machyi shim ai salum hte shi a nsen hpe madat u. Nang hpe hkye mawai la na matu hpyi nem u. Shi a mauhpa atsam hte nang hpang de du sa na matu n hkrit ai sha hpyi jahtau u.
Akyu hpyi sumru ai hta lawm ai hpunau ni yawng, hkumhkrang myit masin wenyi (hkum dingnum) mahkra hpe Wa Karai a mauhpa atsam hte hkye mawai la ai chyeju jaw ya u ga law.
