Daini anhte kasha lahkawng a ga shadawn na la lu ga ai. Shawng nnan kasha wa gaw n gup hte sha asak hkrung let, lai kyang n lawm nga ai. Ndai no (1) masha hpan kaw lawm ai ni gaw Karai Kasang lam hta hkan galaw sa ai. Kyu hpyi ga ni tsun hti ma ai. Raitim Karai Kasang hpe tsawra na, masha ni hpe tsawra na gaw grai n gun yawm nga ma ai. Shanhte hkum shanhte sha grau tsawra ma ai. Nawku hpung kaw na sharin shaga ai madung tara ni mat mat nna, shanhte ni a makam masham lam mung nam nak n nga mat ai.

 N gup aga hku sha asak hkrung nna, lai kyang gaw n lawm mat ai. Kaga mi hta e, dai zawn re ai masha uhpung ni hte n bung na nga chye ai. Kaga masha uhpung ni gaw ga n chye shaga ai. Masha hte si mani ai hku n chye shaga ai. Raitim shanhte dinghpring dingman ma ai. Shanhte hkum hta byin nga ai hte maren hkap la chye ma ai. Shanhte shut ai shaloi galai shai na mung jin jin rai nga ai. Daini gaw n-gup aga hte sha n rai, ta tut hte asak hkrung nga chye ai ni rai ma ai. Shanhte gaw kasha lahkawng kaw na langai wa hte bung nga ma ai. Shingrai anhte mung gara u hpung kaw lawm ga ai kun. Gara hku shani shagu sak hkrung nga pra ga ai kun. Karai Kasang hte anhte a matut mahkai lam gara madang rai taw nga ai kun. Myit sumru ding lik yu na ra ahkyak ga ai law.