N-htoi 12-17.12. 2025, Laman hta Myitkyina Kahtawlik Saradaw Sasana, Shing Bwi Yang, Pang Sau Jau ginwang de Sagu rem wa, Wa Saradaw John Mung Ngwn La Sam, Msg. Dr. Peter Hka Awng Tu hte Wa jau ni sa du kawan lai wa ai.
13 Dec, 2025 ( Bat 6 Ya ) shana de 4:00 Pm aten hta gaw, Shing Bwi Yang Jau ginwang de du shang wa ai shaloi Ginwang Up Wajau, Paul N-sau Gum Dan Nawku hpung masha ni kawn, hte Wa Saradaw hte wa Jau ni hpe, Naga htung hking madum sumpi, yungwi mahkawn ni hte hkap tau hkalum la ai hte Jau Ginwang a lam hpe tang madun ai lamang galaw lai wa nna, Wa Saradaw hpe mung Naga htunghking magun shatlit ni hte rau hkalum la ai hpang Wa Saradaw a n’gun jaw mungga hpe hkam la ai lamang galaw lai wa ai.
Dai hpang 14 Dec, 2025 ( Laban ) Jahpawt 9:30 Am aten Missa, Hkungga Nawng Jau ya nna, dai Missa Hkungga hta,Jau Ginwang kata nga nawku hpung masha Marai – (169 ) tup hpe mung, Wa Saradaw Hte Wajau Dr.Peter Hka Awng Tu, Wajau Luka Layen Dau Hkawng ni kaw nna, N’gun Shaja Sakrementu hpe jaw ya lai wa ai. Ndai Naga Myu sha law malawng nga ai ndai Shing Bwi Yang, Jau ginwang hta, Hpung Htinggaw – (510 ) hte Hpung Masha (2494 ) nga ai rai nga ai.
Dai hpang, 15 Dec 2025 ( Bat 1 Ya ) sahni , Pang Sau Jau Ginwang na Sagu Hpung Masha ni hpang de Wasaradaw hte wa jau ni sa du gawan ai hta, shana de 4:00 Pm aten Ginwang Up Wajau Joseph N’shanghku Ja Yaw hte hpung masha ni kaw nna, Naga Htunghking madum sumpi ni hte hkalum la ai hte Ning-Ri, bawchyawp hte Wa Saradaw hpe shagrau ai lamang galaw lai wa ai.
16 Dec, 2025 ( Bat 2 ) ya jahpawt 9:30 Am aten hta, Nu Maria Lungpu nnan shaman ai, Sara Kaba Luka Htung Wa a Tara Hkaw sara magun (50) ning hpring Ja Jubilee Missa Hkungga Nawng Jau ya lai wa ai. Missa hkungga hta Wa Saradaw hte Wajau kaba Peter Hka Awng Tu kaw nna N’gun shaja Sakrementu hpe jaw ya lai wa ai. Missa Hkungga ngut ai hpang Jubilee madu hpe shakawn shagrau ai lamang hpe galaw nna shana gaw yungwi pinra lamang hpe mung galaw lai wa ai.
Ginra buga sha ni gaw, Bum Yi, Hkauna hpe madunga da magam bungli galaw sha ai hpung masha ni rai nga ma ai hte, ndai Pang Sau Jau Ginwang gaw (India) Gala mung jarit rai nga ai. Jau ginwang hpe 2018 hta, hpaw ninghtan da ai rai nna, Htinggaw ( 200 jan) nga ai rai nga ai.
December 17 ya shani hta Danai de wa yup nna, 18 Dec hta Wa Saradaw hte Wa jau ni yawng a ngwi a pyaw hte Myitkyina de bai du wa lu sai rai nga ai.
