Dai aten laman na num sha law law hta na, hpa majaw Nu Maria hpe Karai Kasang gaw Yesu a kanu tai na matu lata la ai kun? Nu Maria gaw shagrit shanem ai hte Karai Kasang ra sharawng ai lam hpe madat mara ai majaw lata la hkrum ai re. Nu Maria gaw, ‘nye a matu hkan shachyut na nye a agenda, magam bung li nga ai majaw, Karai Kasang a myit ra ai lam hpe ngai n hkan lu na nngai’ nga nna shi n tsun ai.

Madu gaw ndai mungkan hta Shi a masing ni hpe shadik shatup lu na matu shagrit shanem ai ni hte madat mara ai ni hpe galoi mung lata la nna jai lang nga ai. Tsun mayu ai gaw, Nu Maria gaw shi a prat hpe Karai Kasang a npu e shagrit shanem let ap nawng da ai. Maria zawn, Karai Kasang a hpaji byeng-ya hte shang lawm ai lam hpe galoi mung hkan nang nga ga ai kun? Shing nrai, anhte hpe akyu jaw na hpe mu ai shaloi sha anhte madat mara hkan sa nga ga ai kun? Anhte hpe akyu n-jaw ai shaloi, Karai Kasang a hpaji byeng-ya hte shi shang lawm ai lam hpe ningdang kau chye ga ai.

Anhte a sak hkrung lam hta Karai Kasang shang lawm ai lam gaw galoi mung anhte a mai kaja lam, ngamu ngamai lam a matu sha rai nga ai. Anhte a shimlum ai shara kaw nna (sh) yubak mara galaw ai lam kaw nna shaw kau hkrum na re majaw, hkan sa na matu, chye na na matu grai yak ai lam langai hku nna shawng nnan hta mu mada chye ga ai. Rai tim, jahtum e Karai Kasang a masing gaw jaw ai, anhte a akyu a matu hte anhte hpe bai hkye hkrang la na matu re ngu ai hpe chye na wa na re.

Karai Kasang gaw Na a prat a matu tsawm htap ai masing langai mi nga ai, dai masing teng sha byin tai wa na matu Shi nang kaw na langai sha hpyi shawn ai. Dai gaw Karai Kasang a dai masing hta shagrit shanem let hkan sa na matu rai nga ai.