Daini na Ja Chyum Mungga hpe hti sumru yu ai shaloi e, Karai Kasang hpe Maria shakawn ai lam na lu ga ai. Daini hti ai Chyum laika hta ga shaka dingsa kaw na shayi num HaNa hte, ga shaka ning nan na Maria yan a lam hpe tsun da nga ai. HaNa ngu ai shayi num gaw Maudung Num rai nga ai. Shi gaw kasha lu na matu, Karai Kasang kaw hpyi ai shaloi e Kasha Samuel hpe lu sai. Dai majaw chyeju dum na matu nawku htingnu de sa wa nna, Karai Kasang hpe shakawn mahkawn hte shagrau ai. Dai mahkawn hpe sha Nu Maria mung shakawn shagrau ai.

Samuel ngu ai lachyum gaw, Karai Kassang madat ya ai ngu ai re. Yesu a lachyum gaw, Karai Kasang Hkyela ai wa ngu ai re. Hana hte Maria yan gaw, shagrit shanem ai wa, kaji kadun ai ni a nsen hpe gawng malai da ai lachyum nan re. Dai kaji kadun ai ni a nsen hpe ninggawn Madu Karai madat ya ai. Ninggawn Madu Karai wa gaw, shinggyim masha ni a tsun jahtau ai nsen hpe hkap madat la ya nna, masha hpe hkye la na matu, shi a kasha hpe shangun dat ai re. Dai gaw labau ting hta, kaba dik rai nga ai. Ninggawn Madu Karai wa gaw, Nu Maria hpe kaba dik ai arawng aya hpe galaw ya ai nan re. Nu Maria mung madu Karai Kasang hpe shakawn kungdawn nga ai. Anhte mung tut nawng Nu Maria hte Ninggawn wa hpan Madu hpe shakawn kungdawn nga ga law.