Daini na Ja Chyum Mungga hpe hti sum ru yu ai shaloi e, Karai a mungga gaw shawng ningpawt e nga nga sai lam, dai mungga gaw, Karai Kasang hte rau rai nga ai hpe na chye lu ga ai. Christmas poi gaw, Myit mada shara, mau hpa hte hpring zup ai poi re. Anhte yawng mung Hkrismat poi du wa yang kabu pyaw nga ga ai. Kaja wa teng sha Hkrismat poi gaw kabu pyaw ai poi ninghtoi nan re. Hpa majaw kabu pyaw ga ta nga yang, Hkye la Madu Yesu hpe anhte a matu kumhpa jaw ya ai poi shani re majaw rai nga ai. Jahtum chyalai Karai Kasang gaw anhte hpe grai tsawra ai majaw, shi a kasha shingtai anhte hpe jaw ya ai.

Anhte a shut hpyit mara kashin kau ya na matu, Hkyela Madu hpe jaw ya ai. Shing rai anhte shaning shagu galaw ai Hkrismat poi gaw, anhte a mara ni hpe kashin kau ya na matu, Hkye la Madu Yesu hpe shani shagu ra ai hpe shadum ya ai. Anhte mara ni hpe raw dat kau ya ai wa, anhte hpe tut e tsawra ai Karai Kasang re ai majaw, Madu Yesu hpe anhte a masin salum shagu hta shangai lu na ra ga ai. Anhte shada da mung mara dat ya let, tsawra myit garan kachyan ra ga ai. Hkrismat poi gaw Madu Yesu, anhte hte rau nga nga ai poi mung re. Madu Yesu gaw anhte a shani shagu na prat asak hta e, anhte hte rau nga nga ai. Dai majaw anhte yawng gaw Karai Kasang hpe hpai hkawm sa ai ni rai nga ga ai kun?