Daini na Ja Chyum Mungga hpe hti sum ru yu ai shaloi e, Ma Yesu hpe nawku htungnu hta sa ap ya ai lam hpe na chye la ga ai. Ninggawn Madu Karai Kasang hpe anhte hkum nan chye chyang ai hpe gara hku chye lu na ta? Ninggawn Madu Karai Kasang tawn da ya ai Tara kanu lam ni hpe hkan sa shatup ai hte chye chyang lu ai. Madu Karai Kasang mung anhte a prat hta ta tut sak hkrung nga na rai nga ai. Myit htoi Simeon gaw, dingman dinghpring ai wa, Madu Karai Kasang ra sharawng ai hku nga ai wa re. Dai majaw chyoipra ai wenyi hpring zup ai wa re majaw, Madu Yesu hpe n mu nna n si na re ngu shingran lu da ai wa re.

Mosel a tara hte maren jasan jaseng a mu galaw na shani e, Ma Yesu hpe nawku htingnu de woi sa ai. Shaloi Ma Yesu hpe shi a lata hte hkap pawn la n na ninghtoi rai nga ai Hkyela Madu hpe ngai a myi chyaw mu lu sai ngu Simeon tsun let kyu hpyi lu sai. Bai shi gaw Madu Yesu gaw ninghkap ai a kum la ngu n dau shana ya sai. Dai majaw Madu Yesu a hpang hkan ai ni anhte yawng mung ninghkap ai a kumla hkrang rai nga ga ai. N tara ai lam ni, shut ai lam hta sak hkrung nga sa chye ai ladat ni masha hpe dip lu dip sha nga ai ni a lai kyang ni hpe ninghkap ra nga ga ai. Shingrai Madu a hpang hkan ai anhte yawng mung, lam shagu jaw kaja ai hta gwi gwi ta tut hkawm sa lu hkra shakut sa ga law.