Daini na Ja Chyum Mungga hpe hti sumru yu ai shaloi e, Galile mungdaw kaw sasana hpang ai lam hte, shawng na sape ni hpe shaga la ai lam ni na la lu ga ai. Madu Yesu gaw masha unawng uwa a shawng e Karai Kasang a kabu gara shiga hkaw tsun ai hte sumsing mungdan hpe gaw de hpang wa sai. Dai sumsing mungdan gaw de na matu, shawng n nan e, myit malai lu na matu saw shaga nga ai. Dai masha unawng hpe shi a kabu gara shiga hpe hkap la kam sham shangun nga ai. Bai shi hte rau sumsing mungdan lam gaw de sa na matu, shi hpang hkan ai kasa ni hpe lata la nna, masha hpe hkan hkwi ai ni byin tai wa masai.

Shingrai ndai sumsing mungdan lam gaw de sa na matu gaw, lani mi, shata mi hte ngut na n rai. Shani shagu mungkan htum hkra galaw sa ra ai magam bungli re ai majaw shi Madu a hpang hkan nang ai kasa ni tut nawng e ra nga na rai nga ai. Shingrai masha law law a akyu hpe madung tawn da nga sa ga. Matut nna sumsing mungdan lam hte seng ai, mai kaja ai lam rai nga ai tsawra ai, tara rapra ai, ngwi pyaw simsa ai, matsan dum lama ai lam ni hpe manu shadan nga sa ga. Ndai lam ni hpe tinang nga ai shara makau grupyin hta, sumsing mungdan byin nga hkra gyin shalat shakut sa ga law. Shaloi rai yang Madu Yesu ra sharawng ai lam hta hkawm sa ai ni teng sha rai na ga ai.