Daini na Ja Chyum Mungga hpe hti sumru yu ai shaloi e, Simon a kani hpe Yesu shamai ya ai. Bai Kaperna-um mare kaw nna, Yesu pru mat wa ai lam na chye lu ga ai. Madu Yesu a machyi masha ni hpe tsi shamai ya ai lam hte Nat tsadan hpe gawt shale kau ai magam ni gaw, sumsing mungdan du wa ai lam hpe shadan shadawng ya ai kum la nan rai nga ai. Shingrai masha law law mung Madu Yesu a shamai shatsai ya ai hte nat tsa dan hpe gawt shapraw kau ai lam ni hpe mu mada nna, mau kajawng nga ma ai.

Madu Yesu hpe grai myit yu kaba nga ma ai. Shi galaw ai mau hpa lamik kumla ni mahkra hpe tsun shakawn n ma rai nga ma ai. Dai zawn masha ni e shakawn shagrau ai hpe myit marin taw nga na malai, Madu Yesu gaw shi tau nau myit myit da ai hte maren, masha ni hte tsan ai, simsa ai shara de shi langai chyu sha a kyu hpyi nga ai majaw, mungkan ga a gunglau ai lam hpe dang kau lu nu ai. Dai zawn galaw ai majaw, Madu Yesu gaw, tinang galaw sa na magam hta sha myit maju jung nga lu ai. Shi ga madat ai ni anhte yawng mung, tinang galaw sa na magam bungli lam hta sha, myit jung nna galaw sa nga ga ai kun? Shing n rai yang, kaga masha ni e tinang hpe shakawn shagrau na hpe sha myit mada ala nga chye ga ai kun? Tinang a hkum hpe Sumru yu yu ga.