Daini na Ja Chyum Mungga hpe hti sumru yu ai shaloi e, Manggang kap ai wa hpe Yesu jasan jaseng ya ai lam na lu ga ai. Manggang ana kap ai wa kadai raitim mung, grai matsan dum hpa rai nga ai. Grau nna Madu Yesu a aten ladaw hta e, manggang kap ai ni a matu, rip kawp tara ni grai law htam nga ai majaw, shinggyim wuhpung wuhpawng kata hta gin hka kau ai lam ni nga nga ai. Shingrai ana zingli kaw na hkoi tsai mat mayu ai majaw, n gun dating let gwi gwi Madu Yesu a makau de sit sa wa ma ai. Ndai mamnggang ana kap ai wa gaw Madu Yesu shi a ana hpe shamai ya lu ai hpe teng sha kam sham nga lu ai.

Dai majaw shi Madu hpe tsun ai gaw, Madu nang hkraw ai rai yang, ngai hpe shamai ya rit ngu grai kam hpa ai hte hpyi nem wu ai. Shaloi Madu Yesu shi a hpyi nem ai nsen hpe na ai shaloi matsan dum myit rawng ai majaw, mai kaja sai. Nang myit ra ai hte maren, san seng wa u ga ngu tsun dat ai hte rau, dai manggang ana kap ai wa gaw, mai tsai wa nna, shinggyim wuhpung wuhpawng de bai rau nga sa lu nna, hkye hkrang la ai lam lu la nu ai. Shingrai Madu Yesu zawn anhte mung matsan mayam jam jau hkrum ai ni, yak hkak nga ai ni kaw sa du garum shingtau nga ga ai kun? Bai kaga masha ni a myit kraw kata hkam sha lam ni hpe madat ya ai. Dai zawn re ai ni hpe kaja ai ningmu hpaji jaw ya ai. Shanhte hpe n gun jaw ga tsun ai. Akyu hpyi garum shingtau ya ai hku na, garum madi shadaw ya ga law.