Hpaji rawng ai ramma langai mi gaw, kanu kawa, jinghku jingyu ni a myit ra ai lam hpe ninghkap nna, Jau tai jawng de shang na matu dawdan wu ai. Matsan ai hte kasha langai sha re majaw shi a kanu kawa ni gaw shi hpe tsi sarawun galaw shangun mayu ai majaw shi sut su wa nna hpang jahtum shi a kanu kawa ni hpe atsawm sha bau maka lu na re ngu kam ma ai. Raitim shi gaw shi a ra sharawng ai lam hta ngang ngang kang kang rai nga ai majaw shi a jinghku jingyu ni hte manang ni gaw Shi myit n gring mat sai ngu nna masat hkrum nga ai.

Yesu mung, hkawm sa hkawm wa hkaw tsun ai prat hpe lata la ai majaw, shi a jinghku jingyu ni gaw shi  myit n gring mat sai ngu nna shaga hkrum ai. Shi gaw matsan mayan ni hte dip sha hkrum ai ni hpe hkye mawai na matu lata la ai, Yuda tara nkau mi hpe grau nna Laban Nhtoi a tara hpe ninghkap na matu lata la ai. Dai hku nna n-gun ja ai Yuda ningbaw ningla ni a pawt sindawng ai lam hpe hkrum sha ra ai.

Yesu hkawm sa ai lam hpe hkawm sa na matu n hkrit tsang ga. Tinang a lagaw lahkam hta sha, nang hpa mung n shut ai aten du hkra hkan sa nga u. Ya aten hta shanhte nang hpe ninghkap na re, raitim Karai Kasang a aten du jang shanhte hta teng sha nhtoi htoi wa nna nang hpe chye na ya wa na re.

Karai Kasang a nsen gaw mungkan nsen yawng hta grau kaja nga ai. Dai majaw, nhtan shai ai lam ni hte ninghkap ai lam ni hpe n yu ai sha, dai hpe madat mara nna hkan sa ra ga ai.