Cardinal Mungga;
Hkristu Yesu hta tsaw ra ai:
Myitkyina Kahtawlik Saradaw Sasana, Ginwang Up Wa Saradaw John Mung Ngawn La Sam, MF, Namti Jau Ginwang Up, Wa Jau Peter Lagai Tu Hkawng hte Mayan mare na Hpung masha ji nban yawng, Jubali Poi de du sa ai Wa Jau ni, Mama, Brother ni, Tara Hkaw Sara, Sarama ni hte Hpung masha ji nban yawng hpe, Hkristu a ngwi pyaw ai hte shakram nngai.
Ngwipyaw kabu gara awng dang ai chyeju hte hpring ai Shaning Nnan hte kabu gara ai LUNG SENG JUBALI rai u ga! Daini, anhte Mayan mare Buga de Kahtawlik Sasana du shang ai shaning (75) ning du sai majaw, Lung Seng Jubali poi galaw let, Karai Kasang hpe chyeju dum shakawn nga ga ai. “ Kahtawlik Sasana, anhte a Makam Masham hpe sakse hkam ai nhtoi mung rai nga ai law. Shawng nnan, ndai Mayan Buga de Columban Wa Jau Colier sa du nna nawku jawng hpe gaw gap hpang da ya nhtawm, Wa Jau Dawling bai shangut shakre ya ai hpe chye lu ga ai.
Shaning ni law na mat wa nna nawku jawng pyi hten run wa sai majaw, Buga Jau ni a lak-htak hta ndai nawku jawng hpe bai gram lajang gaw sharawt ai hpe mung chye lu ai. Anhte a Buga de Karai Kasang a Kabu Gara Mungga hpe sa du gat hkai ya sai Shawng de na Sasana Ninghkring ni yawng hpe bai myit dum shing-ran let cheju dum na sut la nga ai. Dai hte maren sha, Mayan mare hta shanu nga ai, Lit hkam Tara Hkaw sara, Mungbawng Hpung, La Hpung, Num Hpung hte Ramma Hpung ni, makam masham hte seng ai kaga wuhpung wuhpawng ni yawng mung, dai makam masham nli hpe n shamat kau ai sha, grau nna law htam mayat maya wa hkra myit hkrum myit-ra jawm shakut nga ai majaw, chyeju dum ai, kabu gara let shagrau shakawn nngai.
1. Jubali poi hpe galaw ai a yaw shada lam gaw – “bawng dung hkrum ai ni hpe shalawt dat ya ai” “ban sa ai” “shada da mara ni hpe raw dat ya hkat na” “myit mada na” hte “makam masham npawt hkring-htawng de bai wa na” ngu ai lam ni rai nga ai.
2. Jubali gaw anhte a shawng lam hpe myit n-gun nnan, yaw shada lam nnan hte bai matut hkawm sa ai aten mung rai nga ai.
3. Jubali gaw Karai Kasang hpe Chyeju Dum Shakawn Shagrau na matu rai nga ai Dai majaw, lai mat wa sai shaning (75) ning laman Wa Karai Kasang ndai mare hta shi a myusha ni a matu galaw ya sai mauhpa chyeju ni mahkra a matu anhte jawm shakawn kungdawn jaw ga ai.
4. Jubali gaw anhte a prat hta “Tara Rap-ra ai hte Daw Jau na matu” shadum ya ai Jubali poi hpe galaw ai shaloi, Anhte a masha wuhpung wuhpawng hta tara rapra ai hte nga sa ra ai lam hpe mung shadum ya ai. Anhte a lapran hta nga nga ai matsan mayan hkrum nga ai ni hpe lakawn lanawn na matu mung shadum ya ai. Dai gaw, tinang a makam masham hpe tatut hkan galaw nna sakse hkam ya na matu rai nga ai.
5. San Pra ai Wa Sarabyin Yawhn Pawlu Lahkawng (II) Jubali Hking Lahkawng Ning (EV 2,000) hta tsun ai: – Madu Yesu a Du Sa Ladaw Nnan re; Yesu anhte hta bai shangai wa ra ai; – Anhte a myit sat lawat hte akyang lailen hpe sharai la na aten rai nga ai – Myit malai lu nna prat hpe galai shai kau na ten rai nga ai – Tatut mai kaja magam bungli ni hpe shachyen sa wa ra ai; ga shadawn, lu su nga mai ai mungdan ni gaw, matsan ai mungdan ni a gumhpraw hka ni hpe shaprai, raw dat kau ya ra ai – Htawng hkan sharen da hkrum ai ni hpe hkyamsa jaw ya ra ai. Hpang jahtum hku nna: anhte Mayan mare na Hpung masha ni mung, Jau ginwang hku nna mung, saradaw sasana hku nna mung rau lata gindun let, Jubali a shaman chyeju ni hpe shadang tup hkam la lu myit ga ngu nna akyu hpyi ya nngai. Yawng hpe Wa karai shaman ya u ga.
Bishop John La Sam a mungga;
Namti jau ginwang Mayan Mare hta Karai Kasang hpe kam sham tsawra ai Kahtawlik nawku hpung masha ni nga hpang ai ( 75 ) ning hpring Jubilee poi shani hta e nanhte hpung masha ni Karai Kasang a shaman chyeju hpe laklai ai hku lu la ai shani rai nga ai. Hpa majaw ta nga yang Myanmar mung ting a Saradaw kaba rai nga ai Cardinal Charles Bo nan sa du lu ai ngu ai gaw Karai Kasang a shaman chyeju rai nga ai. Nanhte hpung masha ni Karai Kasang a chyeju hpe lak lai ai hku lu la sai. Daini Ja Jubilee sha n rai, Lung Seng Jubilee rai nga ai. Lung Seng ngu ai gaw ja dik ai. Ja dik ai majaw she manu dan ai. Dai re majaw Mayan mare buga na Karai Kasang a kashu kasha ni ( 75 ) ning nga lai wa ai Karai Kasang hpe kam sham ai makam masham lam ja sai ngu ai hpe madun ai rai nga ai. Ja ai lung seng gaw ja ai kaw arut magang grau nna htoi magang rai nga ai. Hkristan ngu ai gaw dai rai nga ai. Hkristan ngu ai gaw yak ai hpe hkam sharang jin ai dai hpe she Hkristan ngu ai re. Madu Yesu gaw Wudang hpai ai, Wudang hpai ai ngu ai gaw ru yak jam jau hkam ai, ndai hpe hpai nna awng padang lu la ai.
Daini Mayan buga na hpung masha ni Karai Kasang hpe kam sham tsawra ai ( 75 ) ning hpring Lung Seng Jubilee gaw makam masham ngang sai, ja sai ngu ai hpe kam ai. Dai re majaw ya kaw nna Karai Kasang a shaman chyeju law law hpe nanhte hkam la lu na re. Ndai shara hta grau nna Karai Kasang a chyeju hpring chyat let ndai shara kaw na hpaji chye ai ni, mungdan a ningbaw ni, nawku hpung a ningbaw ni law law pru wa na re, grau nna hkik hkam galu kaba wa na re. Daini nanhte a makam masham ( 75 ) ning hpring ai hpe htawng madun sai. Karai Kasang hpe chyeju dum ai, Karai Kasang kaw na shaman chyeju hpyi la lu ai nhtoi rai nga ai. Ndai daram mung masa n pyaw ai, ndai ram yak hkyak ai ten hta Wa Saradaw lahkawng sa du ai, wa jau ni, mama ni, hpung masha ni law law sa du nna hkik hkam ai poi hpe galaw la lu ai gaw shaman chyeju lu ai a lamyik kumla re. Poi a matu shakut shaja sai ni, ndai poi hta sa du lawm ai ni yawng Lung Seng zawn ngang kang ai makam masham chyeju hpe lu la na re.
