Daini na Ja Chyum Mungga hpe hti sumru yu ai shaloi e, Yesu a nta masha ni a lam na chye lu ga ai. Madu Yesu Kabu gara shiga hkaw tsun nga ai a ten hta, shi a dum nta masha majing ni du sa wa ai mung, Madu Yesu a matu kaja dik ai tara mungga langai mi jaw na matu, ahkaw ahkang kaja nan rai nga lu ai. Madu Yesu shi mungkan ga de du sa na a lachyum ningpawt madung gaw, Karai Kasang a mungdan lam gaw gap na matu re. Dai majaw, masha shada jinghku daw ang ai hta, Karai Kasang a yaw shada ai lam hpe hkan sa shatup ai lam gaw, grau nna ahkyak la nga ai lam re ai hpe hkaw tsun dan nga ai.

Dai re majaw Madu Karai a ra sharawng ai lam hpe hkan sa shatup ra nga ga ai. N dai lam gaw Madu Yesu a nta masha ni, jinghku jingyu majing ni nan re ai lam ahkaw ahkang lu ai mung re nga nna, Madu Yesu tsun da nga sai. Shingrai ndai zawn chye na hkap la ai rai yang, Nu Maria hte kasha Madu Yesu yan a hkum sai shan daw ai lam ni gaw, grau grau nna pyi namnak nga ai. Lachyum rawng ai hte grau hkum zup nga ai lam hpe mung chye na la lu ga ai. Dai re majaw anhte yawng mung, Madu Yesu a nta masha jinhku majing ni tai nga lu hkra tut nawng e shakut hkan sa nga ga. Shi Madu a nta masha majing ni tai nga hkra mung ja ja hkan sa nga ga law.