San pra ai CARLO ACUTIS gaw, Daini na Ramma ni a matu kasi la mai ai San pra ai wa langai nan rai nga ai.

San pra ai CARLO ACUTIS gaw, Lai wa sai September 7.2025 ya shani wa sarabyin Leo (14) hkum nan San pra ai masha tang dat ya sai. Ndai ramma kasha, san pra ai CARLO ACUTIS (Bl. Carlo Acutis) gaw, 3.5.1991 ya shani shangai wa ai rai nga ai.

CARLO ACUTIS gaw ya dai ni na prat a asak shi jan ning re ai ramma langai mi rai n na, kaga yu maya ramma ni zawn sha bu hpun nga sa ai shabrang ma langai mi mung re. Shi gaw ya ndai prat dep Media hpaji hpe myit lawm ai wa mung re majaw, computer programme hpaji ninghkring wa langai mung re.

Shi gaw zet zet ja ja atsang awang rai nga chye ai wa raitim, Karai Kasang hpe kam hpa kam sham manoi manat ai wa mung re. Shi gaw Missa hkungga hpe galoi e mung shang lawm lu hkra shakut ai. Bai shi gaw Missa hkungga garai n hpang shi yang (sh) Missa ngut ai hpang hkying hkum mi tup Chyoi pra hkum sin ai lam hpe tut nawng galaw nga ai shabrang ma wa mung re. Bai Rosary grai hti shakut ai hte, bat shagu e mung mara raw sakramentu hpe man man hkam la ai wa nan re.

Shingrai shi hpe October 12. 2006 ning shi a asak (15) ning  hpring ai shaloi e Karai Kasang woi la kau ai hkrum nu ai. Ya daini du hkra shi a moi mang hten za mat ai lam n nga ai sha, Italy mungdan hta shi sak naw hkrung nga ai yang na hkum hkrang zawn sha nga nga ai. Dai hta grau laklai ai gaw shi a Salum gaw, mi na kaja zawn sha nga nga ai hpe chye lu ai.

Ya a sak shi ning ramma ni a Kasi Kamang wa rai nga ai CARLO ACUTIS gaw, lai wa sai October 10 (2020), ning htoi shani hta e, A lu ai masha ngu tang da hkrum nna, (2025) September (7) ya dai shani hta e gaw, San pra ai masha ngu bai tang da hkrum ai wa mung rai nga ai.

Ndai San pra ai CARLO ACUTIS gaw, asak naw kaji ai raitim, prat dep Media hpe jai sung lang chye ai wa re. Shi myit lawm ai hte maren shi chye ai machye machayng prat dep computer hpaji hpe ta tut jai lang nna Kahtawlik makam masham hpe shachyam shabra lai wa sai rai nga ai. Ramma ni yawng a matu, makam, masham lam hta kasi kamang tai ya ai wa rai nga ai.

Shingrai Myitkyina Saradaw Sasana lit hkam Sagu rem wa, Wa Saradaw John Mung Ngawn La Sam kaw nna mung daini na prat dep social  media hpe jai lang law wa ai prat hta Rmma ni yawng San Pra ai Carlo hpe  kasi yu la nna, shi zawn rai prat dep socia media hpe akyu rawng ai hku mai kaja ai lam ni hta jai lang chye na hpe yaw shada let San Pra ai Carlo Acutis a hkrang sumla hpe Myitkyina St. Columban’s Cathedral, Aung Nan kaw hkrang shachyaw da nna shi a  jau tai ai ( 10 ) ning hpring, Saradaw aya hkam la ai ( 1 ) mi hpring ai Chyeju dum Missa Hkungga galaw ai shani masat dingsat shaman da sai rai nga ai.

Dai shani na Missa Hkungga hta Yangon Saradaw kaba Cardinal Chalres Bo hte rau, wa jau ni, Brother ni, Mama ni hte tara hkaw sara/ma ni,  nawku hpung masha ni ( 1000 ) mi daram sa du shang lawm lai wa sai rai nga ai.

San pra ai CARLO ACUTIS anhte a matu a kyu a ra hpyi ya rit law. Amen.