Ma Yesu hpe Nawku Htingnu hta Ap ya ai Poi

Read Lk 2: 22-40

Daini na poi nhtoi hta Ga Sadi Masum hkam let tinang a prat hpe Karai Kasang a matu sak jaw ap nawng taw nga ai Jau Mama, Brothers ni a poi nhtoi mung rai nga. Shanhte a matu alak mi rai akyu hpyi ya ra ai shani mung rai nga ai.

Jaw Jau Laika 12:1-8 hta shadang sha shangai ngut ai Numsha gaw nhtoi sanit ya tup n san seng nga ai. Dai ma hpe matsat ya ngu na shani e matu kadoi na rai nga ai. Pru mat wa Laika 13:14-16 hta mung Karai Kasang gaw kasha alat shagu hpe shi nan madu ai re majaw shi hpang de hkungga sak jaw let bai la ra ai lam tsun da nga ai. Ndai lam ni gaw Karai Kasang hkum nan Mawshe hpe jaw da ai tara ni rai nga ai.

Daini Nu Maria hte Wa Yosep mung Yuda ni a htung tara nga ai hte maren Madu Yesu hpe Htingnu hta ap ya ai rai nga ai.

Daini na kabu gara shiga hta kasi la mai ai masha lahkawng mung nga nga ai. Dai yan gaw Simeon ngu ai wa hte Asher amyu lakung re ai Hpanuela a shayi sha Anna ngu ai myihtoi num langai rai nga ai.

Simeon gaw dinghpring ai hte makam masham kaba ai rai nna, Israela hpe shalan shabran na lam hpe myit mada ala nga ai wa rai nga ai zawn Myihtoi Anna mung shaning (60) ning tup lu sha gam akyu hpyi shakut let nawku htingnu kata hta ap nawng taw nga ai Gaida langai mi rai nga ai. Shan yan a shakut ai lam a majaw dai  Messia Madu hpe n mu la lu ai sha nsi na nga Chyoi Pra ai Wenyi Karai Kasang a Ga sadi shan hta hpring tsup wa ai.

Hkungga tsawra ai Shiga madat nga ai Nu Wa Hpu Nau Ni Daini poi nhtoi kaw nna anhte hpe shadum ya nga ai lam gaw Yesu htingnu hta shi a hkum hpe ap ai zawn anhte a myit masin hkum hkrang hpe mung ap nawng na ahkyak nga ai re. Anthe a myit, anhte a ra sharawng ai hta chyu madung da ai n re sha Karai myit ra sharawng ai hpe madung da chye hkra shakut hkawm sa ga.