Kabu gara shiga hta Madu Yesu hpe shi a buga na masha ni nhkap la ma ai lam na la lu ai re. Ndai wa gaw dai lam ni yawng hpe kanang na lu la a ta? Shi kaning re hpaji byeng ya lu da ai rai kun? Shi a lata hte atsam kaba ai amu ni galaw lu ai gaw hpa wa rai ta? Yuda hte Simon ni a kahpu nrai a ni? Shi a Kanu Kajan ni mung anhte hte rau rau nga nga ai nrai ma a ni?

 Ndai gasan ni gaw Hparishe ni shanhte shada da san ai gasan ni rai nga ai. Ndai Gasan ni a shing du hta Yesu hpe jahpoi asawng ai, yu kaji ai lam ni, hkap la na matu yak ai lam ni grai dandawng nga ai re. Hparishe ni madu Yesu hpe ntsa lam shinggyim masha hku na sha mu lu, chye lu ai. Laksama wa a kasha hku na sha hkap la lu ma ai. Messiah re ai lam, Mahkra hpe dang di lu ai wa re lam hpe hkap la na grai yak nga ai.

Madu Yesu a shing du labau hpe sha yu nna daw dan ai rai nga ma ai. Shanhte dai zawn re ai myit masa rawng ai a majaw Madu Yesu a mau hpa magam lam ni hpe pat shingdang kau ya ai hte bung ai re.

Hkungga tsawra ai shiga madat nga ai Nu Wa Hpu nau ni anhte a prat hta mung dai zawn byin chye ga ai re. Myit tsaw myit dap ai lam ni, hpa zawn nnawn ai lam ni, yu kaji ai lam ni dai lam ni hpring chyat nga yang Karai Kasang a mau hpa chyeju ni anhte a prat hta lwi shang wa na grai yak ai re. Dai majaw dai zawn re myit masa lam ni hpe koi yen shakut hkawm sa yang she anhte a prat hta Karai Kasang a mau hpa chyeju ni a anhte a myit kraw lawang kata de lwi shang wa na re.