2026 ning January shata 28 ya shani galaw ai General Audience hta, Wa Sarabyin Leo XIV gaw, Nawku hpung kata Karai Kasang a mungga hpe gara hku htawn tsun ya ai lam hpe madung tawn nna, Vatican Zuphpawng II a Karai Kasang a hpaw shadan dan ai lam hte seng ai ‘Dei Verbum’ hpe myit sumru let tsun shadum n-gun jaw lai wa ai.
Karai Kasang a mungga hpe “deposit” galaw na matu Nawku hpung hpe ap da sai rai nna, Nawku hpung gaw labau hku nna sadi dung let makawp maga, htawn tsun ra ai lam hpe sang lang dan ai. Ndai Mungga gaw lai wa sai aten hta hkring mat ai zawn n rai, Chyoi Pra ai Wenyi lam madun ai hte ‘Hkring htawng’ kata hta grau sung sung chye na hkawn hkrang wa ai hkrung nga ai tengman ai lam rai nga ai.
Wa Sarabyin gaw ‘Chyoi Pra ai Chyum Laika hte Chyoi Pra ai Hkring htawng’ lapran garan n mai ai matut mahkai lam hpe ahkyak shatai nna, Karai Kasang a npawt nhpang langai kaw nna pru wa ai hte yaw shada lam langai sha de rau jawm galaw nga ai ngu tsun shaleng da nga ai. Shi gaw Kabu Gara Shiga a hkrang sumla ni hpe lang nna — Yesu gaw Chyoi Pra ai Wenyi hpe ga sadi jaw da nna, sape ni hpe amyu bawsang yawng hpe sharin achyin ya na matu shangun dat ai — Hkristu a ga gaw Nawku hpung hku nna gara hku matut nna asak hkrung nna chyam bra nga ai hpe madun dan ai.
Hkring htawng gaw, Nawku hpung a sharin achyin ai lam, sak hkrung lam, nawku daw jau ai lam ni hta Kabu Gara Shiga hpe hkrung nga ai hku htawn tsun ai lam re, nga nna tsun ai. Akyu hpyi ai, hkaja ai, sak hkrung ai wenyi mahkrum madup ni hku nna, grau nna Kasa ni a hpang hkan ai ni a hkaw tsun ai lam hku nna rawt jat wa ai. Ndai hku nna, Nawku hpung gaw shi rai nga ai, kam sham ai lam yawng hpe prat shagu de ap ya nga ai.
San Pra ai John Henry Newman a ga hpe lakap nna, Wa Sarabyin Leo gaw, Hkristan makam masham gaw, kata kaw nna tu kaba wa ai nli tum zawn, hkrung nga ai, rawt jat galu kaba wa nga ai tengman ai lam re ngu tsun shaleng da nga ai. Shi gaw, Chyum Laika hte Hkring htawng gaw, wenyi ni hpe hkye hkrang la na matu, Chyoi Pra ai Wenyi a lam matsun ai npu hta, galoi mung, sadi dung let sin la nga, lachyum shapraw na matu, Nawku hpung a sharin achyin ai ahkang aya hpe ap ya ai, ngu ai hpe bai madi shadaw let, shi mungga hpe hpungdim dat ai.