San Pra Ai Bernadetta Soubirous
(1844-1879)
Lourdes mare kaw Nu Maria Dan Pru Ai Mabyin (1858)
San Pra ai Bernadetta Soubirous gaw Fransik mung na Lourdes mare kaw 1844 ning hta shangai wa sai. Shi a kanu kawa ni gaw matsan ai ni rai ma ai. 1858 ning February shata 11 ya shani, Bernadetta gaw manang jan 2 hte rau Cave (the Gave River) Hka kau kaw hpun sa hta nga ma ai. Dai Masabiele lungpu de du yang shi a manang lahkawng yan gaw, Bernadetta hpe kau da n na hprawng mat ma ai. shaloi e n bung laru kaba ru wa ai. Lung pu ting hta htoi tu kabrim wa ai. Bernadetta mada yu dat ai shaloi gaw, ahpraw re ai palawng n tsa n shang e lamu n sam shingkyit kyit da n na, hkum shingyan grai tsawm ai num langai mi hpe mu nu ai.
Shi gaw hpraw tu tsawm ai bu hpun hte mawn sumli da n htawm; shi a lata kaw Rosary hkachyi lang da nga ai. Shi a lagaw ntsa numri pan lahkawng mara nga ai. Bernadetta gaw shakut n na, Wu dang masat galaw ai raitim shi a lata gari nga ai majaw n mai galaw nga ai. Hpraw tsawm la ai num jan gaw mani sum sai rai shi hte rau Rosary akyu hpyi na matu Bernadetta hpe shaga wu ai.
Masum ya lai ai hpang dai lung pu de Bernadetta bai sa ai shaloi palawng a hpraw hpun ai Num bai dan pru wa ai. Shi gaw Bernadetta hpe (6) ya tup matut manoi n dai shara de sa na matu hte, shut hpyit mara galaw ai ni myit malai lu wa na matu mung akyu hpyi ya na the, dai shara kaw nawku jawng gap na matu jawng dung Jau hpe wa tsun shangun ai. Bai nna dai makau kaw na mauhpa hka hpawk byin pru wa nna dai hka hpe lu shangun nga ai. Bernadetta mung (15) ya tup dai shara kaw sa ai. Shaloi masha hkying kaba shia hpang e hkan sa ai raitim, marai langai mi mung n dai mau hpa namik kumla hpe mu lu na chyeju n lu ma ai.
Ndai num jan hpe Bernadetta mying san yu ai shaloi shi tsun ai gaw: “Ngai gaw npawt shut hpyit mara n kap ai sha na-um nasin wa ai wa rai nga ai.” nga nna bai htan ya ai.
Bernadetta gaw 1866 ning hta Nevers mare kaw na Charity Ma Ma magam gun hpung (Sister of Chrity) kaw shang mat ai. Shi a manang Ma Ma ni gaw Bernadetta a shagrit shanem myit hte hkam sharang ai myit jasat hpe grai nan yu mau n na shagrau ma ai. Lani mi hta shi a manang ni gaw Nu Maria shi kaw dan pru ai mabyin a lam san yu ma ai. Shaloi Bernadetta gaw: “Dai mahkawn jan gaw maza ni hpe ye jasan kau na matu, ngai hpe ding ye shatai ai she re. Yeng seng ye shatsai ngut jang, ding ye hpe chinghka shing du kaw bai tawn da ai hkrai rai nga ga ai.” Ngu nna bai htan ya ai.
San Pra ai Bernadetta gaw, 1879 ning shi asak 35 ning hta Rosary akyu hpyi nga ai aten hta nsa hti mat nu ai. 1908 ning hta shi a moimang hpe hpaw yu ai shaloi, shi a hkum shan gaw n hten n yat, majing malang rai nna nan bai mu lu ma ai. Dai sha n-ga shi a nten ni gaw sumsing mungdan na mani sumsai re ai nsam hte rai tsawm taw nga ai hpe mu lu ma ai.
Wa Sarabyin Pius 11 gaw 1933 ning hta Bernadetta hpe San Pra ai Masha nga nna masat shagrau ya sai. Shaning shagu masha mun sen kaba gaw, Lourdes de sa du n htawm akyu hpyi let, mau hpa hka hpawk kaw na, hka lu ai majaw hkum hkrang myit masin wenyi a hkamja lam hpe lu la shajang nga ma ai.
