Tengman ai lam a majaw Yawhan Baptist baw htau sat kau hkrum ai lam na la lu ga ai.

Tengman ai lam hta tsap na matu gwi ai myit masin ra nga ai. Gwi ai myit masin ngu ai gaw hpa rai ta? Nhkrit ai hpe ngu ai n re. Tengman ai lam a ntsa gwi gwi tsap ai, jaw ang ai lam hpe tsawra myit hte tsun ai, yak hkak ai lam law law nga ai lapran kaw nna lu hkra galaw ai lam hpe ngu ai re.

Gwi ai myit ngu ai gaw Chyoi pra ai Wenyi a apu asi ni hta na langai mung rai nga ai.

Herod shi hta Jaw ai lam, tengman ai lam hpe shi chye nga ai. Raitim shi hta ra rawng ai lam gaw jaw ai lam, tengman ai lam hta n tsap ai sha masha ni tsun na hpe hkrit ai a majaw n jaw ai lam hta tsap mat ai re.

Anhte a prat hta mung Herod zawn byin chye nga ga ai. Shani shagu na ta tut sak hkrung hkawm sa ai lam hta mung jaw ai hte n jaw ai lam ni kapyawn nna byin wa chye ga ai. Myit yak na zawn ai aten ni nga ga ai. Jaw ai tengman ai lam hta gwi gwi tsap na matu anhte hpe sharin ya nga ai.

Madu Yesu a sharin shaga ai hte shi a mungga hte maren sak hkrung hkawm sa ra ga ai.

Anhte a prat hta masha langai ngai hpe ga sadi jaw ga na re. dai ga sidi gaw Masha langai a prat hpe galu kaba shangun mai ai zawn hkrat sum hten za ai lam de man yawng shangun chye nga ai. Masha langai a prat hkrat sum hten za na zawn re ai ga sadi rai wa yang mung nhkrit n-gaya ai sha jaw da ai ga sadi hpe dawm la chye na a hkyak nga ai.