Daini na hti ang ai Madu a kabu gara shiga gaw Marku a laika 6:30-34 hta na rai nga ai.

Magam bungli galaw nna wa ai kasa ni shanhte hkrum lai wa ai mahkrum madup lam ni hpe Yesu hpe bai n htang tsun dan ma ai.

Madu Yesu mung kasa ni hpe zim ai shim ai shara de hkring sa la matu matsun dat ai. Masha law ai a majaw hkringsa na aten, sha na aten pyi nlu ai madang rai nga ai hpe mu lu nga ai.

Hkring sa ai aten hpe gawgap ya ai rai nga ai.

Anhte yawng gaw mungkan magam bungli chyu galaw let kyin katut nna hkring sa na aten pyi she malap hkra magam bungli galaw chye ga ai.

Hkum hkrang a ban sa lam ra ai zawn wenyi a hkringsa na aten mung ra ga ai. Wenyi a hkring sa ai lam ngu ai gaw Karai Kasang kaw akyu hpyi ai lam rai nga ai. N’gun bai ban la ai lam rai nga ai.

Yesu hpang n htang wa ai lam n nga ai sha galaw nga ai magam bungli ni gaw kaman lila sha re. Galaw nga tim lachyum n rawng ai zawn nga na re.

Christan ni a nga sat nga sa ai lam hta rap ra ai hku chye nga ra ai lam hpe shadum ya nga ai. Mungkan a magam bungli mung galaw let Wenyi a matu hkring sa let akyu hpyi sit shang na matu sharin ya nga ai re.