Mungkan gaw myit daw myit hten ai hte tawn kau hkrum ai ni hpe Karai Kasang myit mada shara jaw ya ai, nga nna Wa Sarabyin Leo XIV, Laban shana de na Angelus mungga hta tsun lai wa ai. “Ndai ni gaw, teng sha nga yang, nsin a labau kata hta Madu gaw wan shatu ya ai nhtoi ni rai nna, Kawa gaw Kasha hku nna, Chyoi Pra ai Wenyi a atsam hte shadik shatup ya ai hkye hkrang la ai masing hpe hpaw shadan dan nga ai.”
Anhte a prat hpe nnan bai galai ya ai
Bum ntsa e, Hkristu gaw sape ni hpe nlung ntsa hta nrai, myit masin hta tara nnan hpe ka da ya ai. “mungkan ga gaw hkrat sum mat ai zawn rai nna, tsin-yam tsindam ni hte hpring chyat nga ai aten hta pyi” anhte a prat hpe nnan bai galai ya ai, kaja ai hku galaw ya ai, nga nna Wa Sarabyin tsun shalawm da nga ai.
Karai Kasang chyu sha, “matsan mayan hkrum ai ni hpe teng sha shaman chyeju lu ai ngu tsun lu ai, hpa majaw nga yang, shi gaw n htum n wai tsawra myit hte yawng hpe jaw ya ai tsaw dik htum ai kaja ai lam rai nga ai,” Shi chyu sha “ngwi pyaw simsa lam hte tara rap ra ai lam hpe tam ai ni hpe myit dik shangun lu ai, hpa majaw nga yang, Shi gaw mungkan a tara rap ra ai tara agyi wa, htani htana simsa lam a npawt nhpang rai nga ai.”
Wa Sarabyin matut tsun ai hta, “Karai Kasang hta sha sumnung shingdi ai, matsan dum chye ai, myit masin san seng ai ni gaw kabu gara lam lu la ma ai, hpa majaw nga yang, shi gaw shanhte myit mada ai lam ni hpe shadik shatup ya ai wa re” nga nna, zingri zingrat hkrum ai shaloi, hkye hkrang la ai lam lu la nna, masu hkalem ai lam hta, “tengman ai lam a n-gang hpe lu la ma ai” nga nna tsun ai.
‘Kabu gara nna kabu hkinlum nga mu’
N-gun atsam rawng ai ni gaw mungkan ga hpe galoi mung uphkang na hpe myit mada ai, Beatitudes, a’lu ai tara ni gaw, nhtan shai ai zawn teng sha rai nga ai.
Yesu gaw nsin a labau hpe htoi tu shangun ai. Dai hpe awng padang lu ai ni ka da ai hku nrai, dip gamyet sha hkrum ai ni hpe hkye la ai hpe shadik shatup lu ai Karai Kasang ka da ai she re,” “Karai Kasang gaw grau nna mungkan gaw myit daw myit hten ai hte tawn kau hkrum ai ni hpe myit mada shara jaw ai.”
Kabu gara lam a shadawn shadang langai
“Beatitudes, a’lu ai tara ni gaw anhte a matu kabu gara lam hpe shadawn shadang langai byin wa ai” ngu shi tsun ai. Ndai ni gaw “dai shadawn shadang hpe mari la na matu awng dang ai lam langai hku mu mada ai kun, garan jaw na matu kumhpa langai hku nna mu mada ai kun, anhte hte rau nga ai hku hkau lam ni hta tawn da ai kun ngu ai hpe tinang hkum tinang san jep yu na matu rai nga ai.”
Hkristu a chyeju majaw, “chyam dinglik hkrum ai ni a atsam rawng ai lam gaw hkye hkrang la hkrum ai ni a kabu gara ai lam de galai shai wa ai.Yesu gaw tsan tsan kaw na shalan shabran ya ai hpe tsun ai n re, grau nna tsin-yam tsindam hkrum ai aten hta anhte hte ni htep ai hku chyeju jaw ya nga ai hpe tsun ai.”
“Beatitudes, a’lu ai tara ni gaw shagrit shanem ai ni hpe sharawt ya nna, gumrawng gumtawng ai ni hpe shanhte a myit masin kata hta shabra kau ya ai” nga nna Wa Sarabyin tsun lai wa ai.
