Daini hti ang ai Madu a kabu gara shiga gaw Luka laika 5:27-32 hta na rai nga ai.
Daini na kabu gara shiga hta Madu Yesu kang hta ai Lewi hpe shi hpang hkan na matu saw shaga ai hte maren kang hta ai Lewi mung shi hta nga ai arai yawng mayawng hte hpe tawn kau da nna shi hpang hkan nang ai lam na la lu ga ai.
Madu Yesu hpang de hkan nang lu na matu daw dan gwi ai myit rawng ra ai. Lewi wa shi hta lu ai arung arai yawng hpe myit marin nga ai lam n nga ai sha tawk hprut tawn kau da let Madu Yesu hpang de hkan nang wa ai. Tawn kau da sai arung rai ni hpe mung myit marin nga ai lam n nga ai re. Mungkan lam hku yu ga nga yang sum mat ai, lahpawt lama re ngu mu mai nga ai. Raitim Mungkan a sut gan hta grau ai lam hpe shi lata la sai re.
Hkungga tsawra ai Nu, Wa, Hpu Nau ni Madu Yesu hpang de hkan nang na matu grai yak na re. Madu Yesu hte anhte a lapran hta pat shingdang ya ai lam amyu myu nga na re. Ja Gumhpraw kun? Arawng aya kun?
Tinang hta lu ai mungkan a sutgan ni, arawng aya ni, hpaji ni gaw Madu Yesu hpang hkan na matu pat shing dang ai arai n re ai sha Lam shatai let Madu Yesu hpang du hkra hkawm sa ga.