Hkrun lam yak hkak ai shara rai nga ai Hka Hku Mung de hpung kawan du hkawm ai ten Wa Saradaw hte Wa Jau ni, Ramma ni a myit hta hkam sha ai lam tsun shapraw da nga ai.

Fr. Bernard Dashi Tang Ji:

Ndai shara du ai shaloi Wa Jau a myit hta hkam sha lam ni amyu myu pru wa ai. Langai mi gaw myit hta mara lu ai zawn nga nna mung hkam sha ai. Hpa majaw nga yang Wa Jau, jau tai ai daining ( 27 ) ning hpring wa sai, dani she ndai Htingnan Ga, Hka Hku Mung de du kabye yu ai re.

Grai pyaw ai shara mung re, anhte a matu grai manu dan ai, labau nga ai shara mung re majaw shawng de jahkring hkring du ra ai shara gaw re. Raitimung magam bungli amyu myu a majaw n lu du ai. Daini gaw Karai Kasang a chyeju hte lu du sai. Ndai kaw na hpung masha ni hpe du kawan lu ai, hkrum lu ai majaw grai kabu ai.

Bishop John Mung Ngawn La Sam;

Ndai shara kaw du ai aten hta e grai marit maroi nga ai hpe hkam sha lu ai. Hpa majaw ta nga yang anhte kaji kawoi ni ndai shara hta e shanhte shaning law law nga pra lai wa ai, shanhte shakut shaja ai lam ni hpe mu lu ai. Shanhte Karai Kasang hpe hkap la kam sham wa ai lam hpe mu lu ai. Karai Kasang a shaman chyeju law law hpe mu lu ai.

Shanhte a kashu kasha ni rai nga ai anhte ni mung daini shanhte shakut shaja ai, shanhte a makam masham a majaw anhte kashu kasha ni lawu mung ga de, myo ga de du nna hpaji chye chyang ai, kung zet galu kaba ai kashu kasha ni law htam wa ai rai nga ai.

Anhte a kaji kawoi ni a buga de bai du wa ai shaloi Karai Kasang hpe grai chyeju dum ai. Daini ndai buga kaw na hpung masha ni hte hkrum lu ai majaw mung grai kabu chyeju dum ai. Ndai buga hta Karai Kasang a shaman chyeju grau grau hkam la lu mu ga. Ndai kaw nga ai nawku hpung masha ni hte mung chying sha ni yawng Karai Kasang shaman chyeju grau nna hkam la lu mu ga akyu hpyi shaman ya dat ai.

Fr. Lucas Layen Dau Hkawng;

Daini ndai shara hta Karai Kasang a chyeju hte du wa lu ai majaw Karai Kasang hpe chyeju dum ai hte Wa Saradaw a hpung kawan hkrun lam hta shi woi awn ai hku nna du wa ai lu majaw grai chyeju dum ai.  Moi 1992 ning hta Kachyihtu de magam gun lai wa ai ten na bumga de bai myit dum wa ai.

Bumga de nga timung ya gaw moi na hta grau grau rawt jat galu kaba wa ai hpe mu mada ai sha n-ga, daini na hpung masha ni a shakut shaja nga ai lam ni, mung chying sha ni myit hkrum myit ra, nawku hpung n ginhka, nga nga ai lam hpe wa mu ai shaloi, grai n’gun lu ai.

Daini anhte Myanmar Mungdan ting ngu ai aten hta e ndai zawn nawku hpung ni ginlung, zinlum ai hte kadai mung n ginhka ai sha matut nna shada  myit hkrum myit ra hte sak hkrung nga pra ra ai. Anhte gara shara kaw nga timung Karai Kasang a Mungga hte rau matut nna sak hkrung nga jang gaw grau grau galu kaba ai prat hpe gaw gap lu na re, Karai Kasang yawng hpe makawp maga ya u ga ngu shaman ga hte akyu hpyi ya dat ai.

Shd. Bruno Pahkawng Tu Nan ( Yungwi Shadang );

Htingnan Mare kaw du wa ai shaloi nye a myit hta hkam sha ai lam ni nga ai. Myitkyina Saradaw ginwang hta jau ginwang ( 33 ) nga ai hta na tsawmra yak hkak ai shara, hkrun lam mung yak hkak ai shara hta ndai Htingnan jau ginwang mung langai lawm ai. Daini Wa Saradaw hte Wa jau ni hte rau hpung kawan du wa ai shaloi kade yak hkak ai hkrun lam re ngu ai hpe ta tut hkum nan mu lu ai, hkam sha lu ai nam chyim gaw masha ni tsun jahta dan ai hta grau hkam sha ai.

Ndai kaw ramma ni mung grai law ai, jau ginwang mung grai dam ai hpe mu lu ai, ndai zawn yak hkak ai shara hta tsun shaga na ahkaw ahkang lu ai, Wa Saradaw hte wa jau ni hkum nan du nna ndai kaw na mare buga masha ni kaning rai galaw lu, galaw sha nga ai, shanhte a mahkrum madup, shanhte a yak hkak ai lam ni mahkra hpe Wa saradaw ni kaw nna hkrum shaga ai a marang e, ndai Htingnan jau ginwang hta matut nna ra nga ai, Htingnan mare hta rawt jat galu kaba wa ra ai lam ni hpe mu lu na re ngu nna hkam la lu ai.

Anhte Myo mare kaba shara shagu hkan du nga sai ni mung ndai zawn re ai sumtsan buga yak hkak ai shara hta nga nga ai hpaji ningtawn mayu ai, ra rawng gawng kya nga ai, kaji kadun nga ai mare buga hkan nga ai anhte Wunpawng myusha ni hpe myit dum la nna pawnba madi shadaw garum la ga. Ndai kaw ramma ni grai law nga ai, shanhte a yup mang shingran ni hpe anhte shada da garum madi shadaw hkat ga ngu Myo mare kaba hte maigan mungdan hkan nga ai wunpawng myusha ni yawng hpe garum hpyi saw shaga dat lu ai.

Shiga – Julia Ja Ing