Daini hti ang ai Madu a kabu gara shiga gaw Luka a laika 11:29-32 hta na rai nga ai.

“Ndai prat ban na amyu ni gaw n hkru ai amyu rai nga ai; shanhte lamik kumla tam nga ma ai; raitimmung, Yona a lamik kumla hta kaga, hpa lamik kumla mung shanhte hpe jaw na n rai”

Ya prat hpe dinglik yu dat yang hpung tang hpaji grai madang tsaw wa ai hpe mu mada nga ai. Dai zawn madang tsaw wa ai zawn anhte a ningmu ni mung hpaw wa ai, grai galai shai wa ai hpe mu mada nga ai. N mai byin na zawn re lam ni hpe mung galaw lu wa ai prat re. Lam shagu hpe sawk sagawn mahtai shaw lu ai prat rai wa ai re. Mu lu, jum lu, mahtai lu yang she kam wa ai prat rai nga ai. Makam masham hpe mung dai zawn grai sawk sagawn wa ai prat re.

Daini na kabu gara shiga hta mung lamik kumla chyu tam ai masha ni a lam na la lu ai. Anhte a prat hta shawng gawgap ra na gaw makam masham re. Jet ai makam masham she nga u laklai ai lamik kumla ni hpe hkam la lu na re. Shani shagu na sak hkrung hkawm sa aten jet ai makam masham hpe gawgap lu hkra shakut hkawm sa wa ga.