Daini na hti ang ai Madu a kabu gara shiga gaw Luka 6:36-38 hta na rai nga ai.
Daini na kabu gara shiga hta Madu Yesu anhte hpe hpaji jaw taw ai n re. Saw shaga taw ai re.
- Matsan dum chye na matu
- Masha hpe nje yang na matu
- Mara dat ya na matu
- Lahpawt ai myit n rawng ai sha garan jaw chye na matu saw shaga nga ai
Karai Kasang gaw anhte yawng hpe tsawra matsan dum ai, mara dat ya ai zawn anhte shada da hpe mung dai zawn galaw na matu saw shaga nga ai.
Anhte yawng gaw Karai Kasang a man hta mara kap ai ni hkrai re. Shut kataw chye ai, gawng kya ai masha ni rai nga ga ai. Anhte shut kataw wa ai ten Karai Kasang gaw galoi mung myit galu ai hte mara dat ya nga ai. Dai zawn anhte mung shada da mara dat chye na hkat ra nga ai.
Karai Kasang gaw anhte hpe mara dat ya na grai loi ai, anhte mahtang shada da mara raw dat hkat na grai yak ga ai.
Anhte yawng gaw masha ni tinang hpe tsawra na gaw ra ai, raitim masha wa hpe bai tsawra na gaw malap chye ai.
Karai Kasang asan sha tsun da nga ai. Nanhte tinang manang wa a ntsa galaw ai zawn nanhte hpang de bai nhtang wa na re. Ndai gaw matai htang ai n re. Matai htang ai ngu gaw n kaja ai hpe n kaja ai hte nhtang galaw ai hpe ngu ai re.
Masha hpe mai kaja ai lam galaw ya yang tinang hpe Sumsing lamu na Kawa Karai Kasang gaw anhte hpe mai kaja ai chyeju ni hpe bai jaw ya na rai nga ai.
Nkaja ai lam hpe Kaja ai lam hte awng dang shangun ai re.