AHKYAK AI, MADUNG GA SI NKAU MI
4. Yesu a sape ni gaw, manu dan ai manam pyaw ai baw hpe Yesu a baw ntsa e ru bun ai numsha hpe mara shagun ma ai. Shanhte ndai hku tsun ai: “Ndai mura hpe manu kaba hte dut kau nhtawm, matsan mayan ni hpe karan jaw lu na re” nga nna tsun ai. Rai tim, Madu gaw shanhte hpe: “Matsan mayan ni gaw nanhte hte rau tut nawng anga nga na ma ai, ngai chyawm gaw nanhte hte rau tut nawng anga nga na n rai” (Mt 26:8-9,11). Dai numsha gaw, shi a tsawra myit yawng hpe ru jaw lu ai, grit nem ai hte nni nkri hkrum nga ai Meshia hpe Yesu hta mu mada ai. Dai namman chya hkam ai lam gaw, nhtoi loi mi laman hta ju baw chyawp hte achyaw kau hkrum na bawnu hpe shalan shabran ya ai lam re! Kaji ai hku galaw ai lam gaw teng sha rai nga ai, raitim, tsin-yam tsindam hkrum nga ai ni gaw, tsawra myit kaji mi pyi kade daram kaba ai, kade daram shim lum lam jaw lu ai hpe chye ma ai. Yesu gaw dai hpe chye na nna, shi a hkrang bung sumla hpe myit dum ai lam gaw grin nga na re ngu sape ni hpe tsun ai: “Ndai kabu gara shi ga hpe mungkan ting shara shagu hkaw dan ai shaloi, shi galaw ai lam hpe shi hpe myit dum na matu tsun dan na mara ai” (Mt 26:13). Dai numsha a shamu shamawt lam gaw a asan sha re ai raitim amu kaba rai nga ai. Tsawra myit a kumla langai, kaji dik htum rai yang pyi , galoi mung malap kau na n rai, grau nna, dai aten na Madu zawn, tsin-yam tsindam hkrum nga ai, katsi katsang rai nga ai, ra kadawn nga ai ni hpe madun dan nga ai.
5. Rai yang, Madu hpe tsawra ai gaw, matsan mayan ni hpe tsawra ai hte langai sha rai nga ai. “Matsan mayan ni gaw nanhte hte rau tut nawng nga nga na ra ai” (Mt 26:11) ngu tsun ai Yesu langai sha, sape ni hpe mung “Ngai nanhte hte rau tut nawng nga nga nngai” (Mt 28:20) ngu ga sadi jaw da nga ai. Shi tsun ai ga hpe mung anhte myit yu ga ai: “Ndai nye a hpu nau ni hta na kaji htum ai wa hpe nanhte galaw ai rai yang, ngai hpe mung nanhte galaw myit dai” (Mt 25:40). Ndai gaw shinggyim masha a matsan dum lama ai lam sha n rai, hpaw shadan dan ai lam rai nga ai: kaji kadun nga ai ni hte n-gun n rawng ai ni hte matut mahkai ai lam gaw Madu hte hkrum katut na matu madung lam rai nga ai. Matsan mayan ni hku nna, anhte hpe matut nna tsun shaga nga ai.