Daini gaw, Inexpressible Joy (N Chye Tsun Shapraw Lu ai Kabu Gara ai) ngu ai hpe bai jawm sumru yu ga. Kasa Petru a shagun laika hta shi shamying ai kabu gara ai hpe madat yu ga:
1 Petru 1:8-9 “Nanhte Madu hpe n mu yu tim, shi hpe tsawra myit dai. Nanhte shi hpe n mu yu ai rai tim, shi hta kam sham nna – hpung shingkang hte hpring ai, nanhte a makam masham kaw na pru wa ai, n chye tsun shapraw dan ai kabu gara ai, wenyi a hkye hkrang la hkrum ai hte kabu nga myit dai”.
Patru a laika hta lawm ai “hpung shingkang hte hpring nna, n chye tsun shapraw dan ai kabu gara ai” gaw kaning re ai hpe ngu ai kun?
Karai Kasang a chyeju anhte a ntsa e kaba la nga nna law htam nga ai hpe anhte a nten aga hte n lu, n chye tsun dan ai gaw kaning re ai hpe ngu ai rai kun?
Sumsing lamu na anhte a Kawa gaw shi hpan hpajang da sai lam ni hpe mau mahka, shagrau shakawn chye na matu anhte hpe hpan shachyaw ya sai.
Shi a kasha ni a ntsa tawn da ai shi a tsawra myit hte matsan dum lama ai gaw shinglet hte, laika hte n dang dep lu nga ai.
Shi a shingra tara (marai nsam) gaw namukdara hta grau dam, sung nna, htum ngu ai n nga ai re majaw, lawan dik ai sanghpaw ni pyi shi a salum matu de galoi n dep du lu nga ai.
Shi a tsawra lanu lahku ai gaw atsam kaba rawng dik la nga ai majaw, anhte shi a kasha ni, shi hte gingdan hkra shagrau shakawn na n mai byin nga ai.
Wa Karai gaw mai kaja la nga ai rai tim, anhte shinggyim masha a prat gaw, gawng kya nna hten za mat na loi la nga ai. Shi a mai kaja ai hpe anhte hkam la na n ging dan tim, shi anhte hte galoi mung rau ni htep nga na hpe ra sharawng nga ai gaw Mauhpa wa n rai nga a ni?
Dai majaw, Ga Shagawp sara wa tsun ai, “Lama ma hpe makoi da ai gaw, Karai Kasang a arawng rai nga ai: Lama ma hpe sawk yu na chyawm gaw hkawhkam a arawng rai nga ai.” (25:2)
Anhte a sawk tam ai lam hpe Mahte 13:44 hta mung Madu Yesu sanglang dan ai: “Sumsing lamu a mungdan gaw ga dachyawk hta e, makoi da nna, masha mu hkrup lu ai hte, bai makoi da ai sutgan hte bung nga ai; kabu gara ai myit hte shi wa nhtawm e, shi lu malu hte hpe dut kau nna, ga dachyawk dai hpe mari la wu ai.”
Ya, asim sha nga nna sumru akyu hpyi ga:
N htum n wai rai nna, mauhpa rai nga ai Karai Kasang a shingra tara (marai nsam) hpe sumru yu ga. Roma 1:20 hta Kasa Pawlu tsun ai: “Shabyin da ai arai ni hpe tau yu yang, ginding aga lat kaw nna shi a marai nsam ngu ai, htani htana atsam hte Karai Kasang shing-yan gaw leng leng adan nga ai”.
Anhte dai Karai Kasang hpe tam nga ga ai hpe Shakawn Kungdawn sara wa tsun da ai:
“Karai Kasang e, nye a Karai Wa nang rai nga ndai. Jahpawt jau jau e ngai nang hpe tam na nngai. Hka n rawng ai hkaraw ai hte krin ai prang hta e, nye a myit masin nang hpe shagrau gara nga nna, nye a hkum shan nang hpe marit nga ai.” (63:1)
Anhte mung ya kaw nna, hki ba nga ai anhte a myit masin wenyi ni hpe shabran ya lu hkra Wa Karai hpe dingman ai hku tam nga ai kasha ni tai nga ga. Ndai Mungkan e jahkyet kau ya ai asak hka-hpawk hpe bai lu la hkra shakut nga ga law. Anhte hpe si ai du hkra tsawra ai Wa Karai kaw hpyi ga.
Yawng Wa Karai kaw na kabu gara ai chyeju hpe hkam la lu myit ga law.
