Tsawra myit hte n htum n wai mara raw ya ai kawa gaw Karai Kasang hta lai nna kaga n rai nga ai. Bai nna, myit malai lu ai kasha kaji gaw, n hkru n kaja ai lam hte yubak kap ai sak hkrung lam hku nna shi a sali wunli yawng hpe jahten kau ai wa gaw, anhte kadai mung byin chye nga ga ai.

Anhte a mara law law a majaw Karai Kasang a tsawra myit, matsan dum lama ai hte mara raw ya ai lam ni hpe n lu hkam la sai ngu myit la chye ga ai. N rai, anhte kade tsan ai de lam dam mat sai raitim, Madu gaw anhte hpang de naw du lu ai. Hpa majaw rai? Karai Kasang a tsawra myit gaw chyam bra nga ai hte shadawn sharam ai n nga majaw re. Anhte galaw shut ai yubak mara kade kaba tim, kadai raitim, yawng hpe hkra lu ai jan zawn rai nga ai.

Raitim, ndai n htum n wai ai hte hkum tsup ai Karai Kasang a tsawra myit de anhte du lu na matu, Anhte a yubak mara yawng kaw na myit malai lu na matu shawng myit ra ga ai. Bai nna, Karai Kasang a man hta shagrit shanem mayu ai myit rawng ra ai. Anhte yawng gaw yubak kap ai ni re ai hpe shagrit shanem let yin la na chye na ra ai. Shing rai, kasha kaji zawn anhte mung Karai Kasang a matsan dum lama ai, tsawra myit hte mara raw ya ai lam hpe ra kadawn nga ga ai.

Anhte a mara raw ya ai, matsan dum chye ai hte tsawra chye ai Karai Kasang hpang de bai nhtang wa na aten du sai. Anhte myit malai lu nna, anhte a mara prat hte mara galaw na matu shadut ya ai masha ni hpe tawn kau da na aten du sai.