Daini na aten hta, anhte a Mungkan gaw “kabu gara ai” hpe tsam-mari ra kadawn nga ai aten rai nga ai. Dai kabu gara ai hpe gara hku anhte shachyam shabra na ngu ai hpe jawm hkaja sumru yu ga.
Kabu gara ai lam hte seng nna Esaia Daw kaba manga-shi-manga: daw kaji shi-lahkawng (55:12) hta Karai Kasang tsun ai ga hpe madat yu ga:
“Nanhte gaw kabu gara let pru wa nna, ngwi pyaw ai hte woi wa ai hkrum na myit dai; bum ni hte kawng ni, nanhte a man e mahkawn mangoi ai nsen hte garu nna, nam mali na hpun ni yawng, lahpawk dum na mara ai.”
Kabu gara ai gaw “kap bra wa ai baw” rai nga ai. N-gun atsam kaba rawng ai. Mungkan a sat lawat, anhte a makau grup-yin hpe Chyoi Pra ai Wenyi a atsam hte galai shai kau dat lu na atsam anhte hta nga ai.
Kaga masha ni a myit ru myit tsang a lam hpe Chyoi Pra ai Wenyi a nhtoi hte anhte shatsang ya lu ai, shanhte hpe Karai Kasang a mai kaja ai lam hpe hpaw madun dan lu ga ai.
Karai Kasang gaw kabu gara chye ai, kabu gara ai hpe shabyin ai wa rai nga ai. Luka Daw kaba shi-manga: daw kaji shi (15:10) hta,
“Nanhte hpe ngai tsun made ga, dai hte maren yubak kap ai masha langai mi, myit malai lu ai majaw, Karai Kasang a lamu kasa ni a man e, kabu gara shara rai nga ai” nga nna Madu Yesu tsun ai.
Bai, Nehemia Daw kaba matsat: daw kaji shi (8:10) hta mung:
“Bai shi gaw, sa wa mu, sau ai hpe sha mu; dwi ai hpe lu mu; n lu ai ni hpe gam jaw mu: daini gaw, Madu a chyoi pra ai shani rai nga ai: myit hkum kaji myit. Yawe hta kabu gara nga ai gaw, nanhte a n-gun atsam rai nga ai” nga nna yawn myit malai lu ai Israela masha ni hpe myithtoi Nehemia n-gun jaw ai.
Anhte a Karai Kasang kadai rai nga ai ngu ai hpe Mungkan de ndau shabra lu na matu gaw – anhte hkum-nan kabu gara ai hpe gun ai ni naw rai ra ga ai.
Kabu gara ai gaw, “Karai kasang hte anhte a lapran na daw hka mat sai matut mahkai ai lam” hpe bai mawai la lu ai kaw na pru wa ai apu asi rai nga ai.
Anhte shani shagu hkrum ang ai mabyin masa ni, masha ni, chyam dinglik hkrum ai, yak hkak ai, bungli hpan amyu hte Mungkan lam ni a majaw, myit pu ba ai lam ni gaw anhte a kabu gara ai hpe gare la kau ya lu na atsam n nga ai; raitim, anhte mahtang, dai lam ni hpe myit salum chyinghka hpaw nna hkap la dat yang chyawm gaw – Wa Karai anhte a matu nga nna san da ai, shi hta kam shamyet ai kaw na pru ai kabu gara ai gaw, dai Mungkan lam ni e lagu la, mya la kau ya ai hkrum sana rai nga ai.
Kabu gara ai hpe gun ai ni tai na matu gaw – Wenyi a apu asi ni hpe Mungkan lam ni a majaw myit hta hkam sha ai lam hta anhte grau manu shadan ra ga ai.
Dai majaw, myithtoi Esaia Daw kaba manga-shi-manga: daw kaji shi-lahkawng (55:12) hta n-gun jaw da nga ai:
“Nanhte gaw kabu gara let pru wa nna, ngwi pyaw ai hte woi wa ai hkrum na myit dai; bum ni hte kawng ni, nanhte a man e mahkawn mangoi ai nsen hte garu nna, nam mali na hpun ni yawng, lahpawk dum na mara ai.”
Asim sha sumru aku hpyi ga:
Kabu gara ai hpe tinang hta gun da ai lam ahkyak nga ai ngu ai hpe sumru yu ga.
Ga Shagawp Daw kaba shi-sanit: daw kaji hkun-lahkawng (17:22) hta: “Kabu gara ai myit gaw, hkam kaja ai tsi rai nga ai; Gawng run ai chyawm gaw, nrut nra ni hpe jahkraw kau nga ai” nga nna tsun da ai.
Nang kabu gara nga ai kun? Gawng run nga ai kun?
Bai, matut myit yu na gaw: Na a kabu gara ai hpe hpa lam e lagu, kashun, mya la kau ya hkrum sai kun?
Kaning re ai masa, masha ni, n jaw n kaja ai hku shatan ai lam ni gaw, na a myit simsa lam hpe mya la kau ya sai kun?
Na a myit n ngwi n pyaw lama rai nga yang, de a ru pawt hpa rai nga ai kun, chye na matu Chyoi Pra ai Wenyi kaw garum hpyi u.
Ga Shagawp Daw kaba shi: kaji hkun-matsat (10:28) hta:
“Dinghpring ai ni a myit mada lam gaw, kabu gara lam rai nga ai; Tara n lang ai ni a myit mada lam chyawm gaw, hten mat na ra ai” nga nna shadum da nga ai.
Matut nna, na a myit mang ai, hkam sha ai lam ni yawng hpe Madu Karai kaw ap tawn da u.
Chyoi Pra ai Wenyi hte sha seng ai lam ni hpe na a myit salum hkap la chye hkra, Shi kaw garum hpyi u.
Langai Htesaloni Daw kaba langai: daw kaji kru the sanit (1 Htesaloni 1:6-7) hta San Pawlu shadum da ai gaw,
“Nni nkri law law hkrum timung, Chyoi Pra ai Wenyi a kabu gara ai hte dai mungga hpe hkap la let, nanhte gaw, anhte a Samnang ai ni mung, dai Madu a Samnang ai ni mung, tai nga manit dai rai nna, Makedoni mung hte, Ahkaia mung na kam sham ai ni nlang a kasi kamang tai wa manit dai.”
Anhte hpe akyu woi hpyi ai Chyoi Pra ai Wenyi Karai Kasang hpe chyeju dum shagrau ga. Mungga hkap madat la nga ai ni yawng hpe kabu gara ai chyeju jaw ya u ga law.
By Cardinal Charles Bo