CHAPTER TWO
GOD CHOOSES THE POOR
Matsan ai ni a lata la ai lam
16. Karai Kasang gaw matsan dum chye ai tsawra myit rai nna, labau hta hpaw shadan dan nna hpring tsup wa ai shi a tsawra myit a masing gaw, yawng hta grau nna, mayam prat, hkrit tsang ai lam, yubak mara hte si hkrung si htan a atsam kaw na lawt lu na matu shi yu hkrat wa nna anhte a lapran de du sa ai lam rai nga ai. anhte a shinggyim masa hpe matsan dum chye ai myi man hte tsawra myit hpring ai myit masin hte tsun shaga let, shi hpan da ai ni hpang de kayin wa nna, anhte a matsan mayan lam hpe yu lajang ya sai. Anhte a shinggyim shingra tara a shadawn sharam ai lam hte gawngkya ai lam ni hpe hkam la na matu shi hkum nan matsan mayan hkrum nna anhte zawn gawngkya ai hkum hkrang hta shangai wa sai. Anhte gaw shi hpe dumsu Ulawng hta tawn da ai ma kaji langai hte udang ntsa e kaya kahpa hkrum ai dai shara hta shi gaw anhte a radical matsan mayan lam, si hkrung si htan hpe hkam la ai.
Dai majaw, matsan mayan ni a matu Karai Kasang a maga kaw nna grau ra sharawng ai lata la ai lam hpe mung, Karai Hpaji hku tsun lu ai hpe chye na na loi nga ai lam hpe Latin America mungdan Puebla Zuphpawng hta dan dawng wa sai. [12] Ndai “ra sharawng ai lam” gaw kaga hpu nau hpung ni hpe garan ginhka ai lam gaw Karai Kasang a matu n mai byin na re. Shinggyim masha yawng matsan mayan hkrum ai hte gawng kya ai lam ni hpe matsan dum myit hte shabyin ya ai Karai Kasang a galaw ai lam ni hpe ahkyak shatai tsun mayu ai re. Tara rap ra ai, hpunau nauna hte kahkyin gumdin ai mungdan hpe gaw de mayu ai Karai Kasang gaw, garan ginhka hkrum ai, dip gamyet sha hkrum ai ni a matu shi a myit masin hta laksan shara nga ai rai nna, shi a Nawku hpung rai nga anhte hpe, madi shadaw ai nna, dawdan lu ai hte atsam rawng ai hku lata la na matu ra sharawng nga ai.
17. Karai Kasang gaw matsan mayan ni a jinghku hte shalawt dat ai wa, matsan mayan ni a hkrap ngu hkrap ngoi ai hpe madat nna, shanhte hpe shalawt dat na matu shang lawm ai wa hku nna, Ga Shaka Dingsa a laika man law law hta chye na la lu na re (cf. Shk 34:7). Matsan mayan ni a shingbyi shara Karai Kasang gaw, myihtoi ni hku nna — grau nna Amo hte Esaia hpe anhte dum ga ai — gawng kya dik ai ni hpe n tara ai lam ni galaw ai hpe mara shagun ai, Israela hpe kata kaw nna nawku daw jau ai lam hpe bai gram lajang na matu shadut ai, hpa majaw nga yang, gawng kya dik ai ni hpe dip sha nga ai shaloi, akyu hpyi, hkungga nawng ya lu na n rai. Chyum Laika a npawt nhpang kaw nna, Karai Kasang a tsawra myit hpe, n-gun kya ai ni hte matsan mayan ni hpe makawp maga nna, shanhte hpe grau nna tsawra ai ngu tsun lu ai, asan sha madun dan nga ai. “Karai Kasang a myit masin hta matsan mayan ni a matu laksan shara nga ai… Anhte a hkye hkrang la hkrum ai labau ting hta matsan mayan ni nga ai hpe mu lu ai.”