Hpyenla langai mi gaw tsan ai shara de lit ap hkrum na re majaw shi a madu jan hpe ndai hku tsun ai: “Ma ni hpe bau maka u. Shanhte gaw lit la chye ai hte Karai Kasang hpe tsawra ai masha langai hkrai byin tai wa hkra anhte a makam masham hpe sharin ya u.”
Madu jan gaw madu wa a matsun hpe hkan sa ai. Shi gaw shan a ma ni hpe makam masham a sharin achyin ai lam ni hpe sharin ya ai, Yesu hpe shanhte hpe shachyen ya ai hte sharin achyin ai lam kaja ai akyang lailen hte manu dan ai lam ni hpe sharin ya ai. Kru ning na ai hpang shi bai du wa ai. Shi a kasha ni yawng kaba wa sai hte shi grai kabu ai gaw shanhte yawng hpe shi a madu jan kaw nna mau hpa zawn bau maka da ai majaw re.
Yesu sumsing lamu de n lung shi yang, sape ni hpe ndai hku hkawm sa na matu hkang da ai: “Kabu gara shiga hpe hpan tawn da hkrum ai ni yawng hpe hkaw dan mu.” (Marku 16:15) Sape yawng gaw, Yesu a hkang da ai ga hpe hkan sa ma ai. Kaja wa nga yang law malawng gaw Yesu a kabu gara shiga hpe rawt jat galu kaba wa hkra sat kau hkrum ai ni rai ma ai.
Yesu a ga gaw hka htung zawn rai nna aten ladaw ni lai wa ai hte maren n htum n wai lwi nga ai rai nna anhte bai htang lu na matu ya aten hta anhte hpe tsun shaga nga ai. Anhte mung sasana langai mi nga ai hte dai sasana gaw hpa rai ta? Kabu gara shiga hpe hkaw tsun nna sak hkrung hkawm sa na matu mung Yesu lit jaw da ai. Kabu gara shiga hpe garan gachyan nna sak hkrung nga saga ai kun?
sak hkrung nga ai rai tim, anhte law malawng gaw htawn tsun ai lam n galaw ga ai. Hpawt de n re, du na bat n re ai sha ya, hpa majaw ya aten nan rai nga ai, hpang na aten hta n rai? masha prat hpe galai shai ya lu ai yesu a ga ni hpe masha law law ra kadawn nga ai a majaw rai nga ai. Law malawng gaw mungkan masa, lu sha let, yubak mara ni the hkrung nga ma ai.
Dai majaw sape ni htawn tsun ai zawn anhte mung kabu gara shiga hpe htawn tsun ra ai, hpa majaw nga yang Madu gaw anhte hpe hkang da nga ai. Anhte sak hkrung hkawm sa ai lam shagu hta Yesu a sharin achyin ai lam ni hpe garan gachyan ga. Yesu a ga madat mara ai shaloi, Shi a sharin achyin ai lam ni hpe rawt jat galu kaba wa hkra karum ya ai shaloi, shi a hpang hkan ai ni grau nna asi si ai, akyu rawng ai ni tai wa ai hpe dum ra ga ai.
Anhte gaw kaga masha ni hpe Yesu hpe shachyen ya ai shaloi, shanhte a matu shaman chyeju tai wa na matu ahkang jaw ga ai. Shi a hkawm sa ai lam hpe hkan sa ai shaloi, ja sutgan hte n rai, wenyi kumhpa ni hte grau nna shaman ya na matu mung Yesu hpe ahkang jaw ga ai.
