Daini na Ja Chyum Mungga hpe hti sum ru yu ai shaloi e, shi hpe ap kau na lam Yesu tau tsun ai. Bai shi hpe Petru nyet kau na lam Yesu tau tsun ai lam ni hpe na la lu ga ai. Madu Yesu gaw, shi hkrum ra na hkrit tsang hpa n ni n kri yubak lam hte si na lam a matu myit hta hkam sha nga ai. Dai hta n ga, masum ning tup arau nga sa ai shi a kasa ni shi hpe sadi n dung ma ai. Shi hpe n chye ai ngu nyet kau ma ai. Bai n kau mi hprawng shakram kau da na hpe mung shi tau nau chye da ai majaw, hkam sha lam hpe mung shi a kasa ni gaw n chye madat ya nga ma ai.

Raitim Madu Yesu shi a kasa ni a ntsa tawn da ai tsawra myit gaw, ding run sha tsawra nga ai. Shanhte hpe e masha ni a man hta gaya jahkrum ai lam ni n galaw ai. Ndai lam ni gaw, Madu Yesu a myit kup ai lam hte yawng hpe maren mara tsun shaga ganawng mazum ai lam hpe madi madun ya ai rai nga ai. Anhte nang ngai rai yang, tinang a ntsa hta sadi n dung ai, tinang hpe ninghkap ai ni, mara tam nga ai ni hpe man hkrum lu shaga na gaw yak la nga ai. Madu Yesu gaw, myit galu kaba ai, byin wa ai lam ni hpe si mani ai hte galaw ningchyang shaw ai, ndai lai ladat hpe anhte a prat hta e mung kasi la hkan sa na ra nga ga ai. Shingrai kaning re ai mang hkang ni hpe raitim, hkam jan lu hkra shakut let hparan sa lu na lam hpe shakut sa ga law.