April shata 12 ya Divine Mercy Sunday Laban shani ‘Regina Caeli’ Sumsing lamu a hkaw hkam ja akyu hpyi ai mungga hta, Wa Sarabyin Leo gaw, makam masham hpe ngang grin hkra galaw ai hta, Missa hkungga gaw madung re hpe ahkyak shatai tsun n-gun jaw da nga ai.
Shi gaw, Paska poi ngut ai hpang 8 ya na ai hpang, hkrung rawt wa sai Hkristu hte hkrum zup ai Kasa Thomas a lam hpe tsun dan nna, wuhpung wuhpawng kata hta byin ai hpe mu hkrup ai, dai ni kam sham ai ni Hkristu hpe tam na matu shaga la hkrum ai hpe madi madun dan ai.
“Ndai mabyin gaw anhte hkum nan hkrung rawt sai Yesu hte hkrum katut ai lam hpe myit sumru yu na matu saw shaga nga ai”, nga nna Wa Sarabyin tsun ai. Shi gaw kam sham ai hpung masha ni hpe “Yesu hpe gara kaw mu lu na kun? Shi hpe gara hku chye na lu na kun? Gara hku kam sham lu na kun?” Wa Sarabyin Leo XIV gaw, kam sham ai lam gaw galoi mung kalang ta, loi ai hku n mai byin ai lam sang lang dan ai. “Thomas a matu mung n loi ai, anhte a matu mung n loi ai”, nga nna, “makam masham hpe n-gun jaw matu ra ai” nga nna tsun ai.
Nawku hpung gaw, “matsat ya ngu na” Laban shani shagu, Missa hkung hpe galaw na matu, kam sham ai hpung masha ni hpe saw shaga nga ai. “Misa hkungga hta, Yesu a ga hpe madat mara, akyu hpyi ga, makam masham hpe tsun shapraw ga… Shi a Hkum hte Sai gaw anhte hpe bau maka nga ai, anhte mung shi a hkrung rawt ai lam a sakse ni tai lu na matu” n-gun atsam lu la ga ai. “Hkristan prat hta Laban shani hte Missa hkungga gaw n mai garan ginhka ai” re majaw, Laban shani na Missa hkungga hta shang lawm na matu ahkyak ai lam hpe matut tsun shalawm da nga ai.
moi na Nawku hpung a sakse hkam ai lam de bai nhtang yu yang,Missa hkungga hpe kau da na hta si hkrung si htan lam hpe lata la ai Abitene mare na Martyrs ni gaw sakse rai nga ai. “Shanhte gaw Missa hpe n galaw ai sha n lu nga ai ngu bai htan ma ai”, lam hpe tsun dan ai.
Wa Sarabyin tsun sang lang dan ai hta, Eucharist, missa hkungga hta she makam masham rawt jat galu kaba wa nna, kam sham ai ni hpe hkum hkrang langai hta kahkyin gumdin nga ai. “Anhte a shakut shaja ai lam ni gaw, shadawn sharam sha rai tim, Karai Kasang a chyeju hte kahkyin gumdin nga ai… shinggyim masha yawng hpe hkap la ai hkye hkrang la ai masing kaba langai hpe shadik shatup lu na matu” rai nga ai.
Missa hkungga ngut ai shaloi na ga si hkum nan gaw “shagun dat ai” ngu ai lachyum rai ai. Hkristan ni gaw, anhte hkam la lu ai lam ni hpe anhte a shani shagu na sak hkrung lam de woi shang wa na matu shaga la hkrum ai, “tsawra myit a sakse ni hte htinglu htinglai ai lam a kasa ni” tai wa na matu shaga la hkrum ai ni re, nga nna tsun ai.