28. Matsan mayan ni hpe matsan dum lama ai lam madun na matu Madu a hpyi shawn ai lam gaw, hpang jahtum na tara jeyang ai lam a ga shadawn kaba hta jahtum da wu ai (cf. Mt 25:31-46), dai gaw matsan dum chye ai ni a Kabu Gara Shiga hpe asan sha madun dan lu ai. Dai ga shadawn hta, Madu gaw anhte a prat hta hpring tsup wa na matu, sumri hpe jaw ya nga ai; teng sha nga yang, “Karai Kasang a myi hta ra sharawng ai chyoi pra ai lam hpe tam ai rai yang, ndai chyum daw gaw anhte hpe tara jeyang na matu asan sha re ai masat langai hpe jaw ya nga ai.” [16] Kabu Gara Shiga hta lawm ai ga si ni gaw “shanhte a n-gun hpe shayawm kau ya lu ai ‘ifs or buts’ ngu ai ga si ni n lawm ai sha, tatut hta jai lang ra ai.
29. Shawng na Hkristan hpung hta, tsawra myit hte galaw ai lam ni hpe, shawng nnan hkaja ai lam (sh) tau hkrau hkyen lajang ai lam ni hta n-ga, Kabu Gara Shiga hta tsun da ai Yesu a kasi ningli hpe hkrak hkan sa ai galaw ma ai. Yaku laika hta sut su ai ni hte matsan ai ni a lapran na matut mahkai lam a manghkang hpe galu galang tsun da nna, kam sham ai ni hpe shanhte a makam masham a tengman ai lam hpe jep joi yu na matu ga san lahkawng san da ai: “Nye a hpunau ni e, nanhte hta makam masham nga ai ngu tsun tim, magam bungli n galaw ai rai yang, makam masham gaw nanhte hpe hkye la lu na kun? ‘Ngwi pyaw ai hte sa wa nna, nanhte a hkum hkrang ra kadawn ai lam ni hpe n lu jaw sha myit yang, dai gaw hpa akyu nga ai kun?” (2:14-17).
30. Yaku matut tsun ai gaw, “Nanhte a ja gumhpraw ni gaw nhkan sha mat na rai nna, dai manu gaw nanhte hpe mara shagun ai sakse tai na ra ai: dai gaw nanhte a hkum hkrang hpe wan zawn sha kau na ra ai. Hpang jahtum na nhtoi ni a matu nanhte sutgan mahkawng da manit dai. Nanhte gaw ga ntsa e sut su ai hte pyaw hpa lam hta nga nga manit dai; Ndai ga ni gaw, anhte n na mayu ai raitim, teng ai ga ni rai nga ai! Ndai zawn re ai hpyi shawn ga hpe Yawhan a Laika langai hta mung mu lu ai: “Mungkan a sut gan ni hpe lu nna, ra kadawn nga ai hpunau wa hpe mu nna, karum shingtau lam hpe ningdang kau ai wa hta Karai Kasang a tsawra myit gara hku nga nga a ta?” (3:17).
