Daini na Ja Chyum Mungga hpe hti sumru yu ai shaloi e, Ngwi pyaw simsa ai lam jaw da ya sai lam hpe na chye lu saga ai. Simsa ai lam hpe nanhte kaw ngai jaw da sai. Ngai a simsa ai lam hpe nanhte hpe ngai jaw da sai ngu daini na, kabu gara shiga hta tsun shadum da nga ai. Simsa ai lam ngu ai gaw, masha a kraw kata hte shinggan hta n ru n ra n nga ai ngu ai hpe tsun mayu ai gaw n re. Ya daini na prat ndai mungkan ntsa hta, majan ni lani hte lani byin shuk shanut wa ai. Shinggyim u hpawng a mang hkang ni, malu masha, nga shara ni a matu shakut shaja sa ra nga ga ai.
Ndai mayak mahkak lam ni a lapran, hkrit gari ai myit, shada da n tsen ai myit ni, dai zawn n teng n man ai lam ni hte, shinggyim masha law malawng wa sak hkrung nga sa ra ga ai. Dai hta sha n rai, yak hkak jam jau ai lam ni gaw, lani hte lani law htam wa ai mabyin kata hta e, hkrit gari ai lam n nga na matu, Madu Yesu gaw tsun taw nga ai.
Shingrai prat hta yak hkak nna, myit kraw kata hta mung simsa ai lam n lu wa ai zawn nga hkam sha wa ai shaloi e, anhte myit sumru yu na lam gaw, tinang a prat Karai Kasang a ra sharawng ai hku nga sa ga ai kun? Ngu ai lam hpe dum sawn yu ra ga ai. Madu Yesu jaw ya ai simsa lam gaw, anhte hpe myit simsa ya lu ai. Dai majaw kaning re ai mabyin lam hta rai tim, gwi ra ai. Karai Kasang hta sadi dung ai hte ngwi pyaw ai hku sak hkrung nga lu na a tsam ningja ni jaw ya ai re.
