Daini na Ja Chyum Mungga hpe hti sum ru yu ai shaloi e, Madu Yesu gaw anhte hpe tsawra nga ai lam hpe na la lu ga ai. Kawa Karai Kasang gaw Madu Yesu hpe tsawra ai zawn, Madu Yesu mung shi a Kasa ni hpe tsawra nga ai lam hpe tsun da nga ai. Tsawra ai myit gaw Kasa ni a masin salum hpe hpaw malang ya nna, Madu Yesu hte grau grau ni htep wa nga ai. Madu Yesu hte arau nga nga lu nga ai. Dai zawn sha Kanu Kawa ni hpe kaja wa teng sha tsawra ai kashu kasha ni gaw, kanu kawa ni a ga hpe madat ma ai.
Masha langai mi hpe tsawra ai shaloi e, shi tsun ai ga hpe madat mara ma ai. Shanhte hpe myit n pyaw hkra n galaw ma ai. Dai zawn sha Karai Kasang hpe kaja wa tsawra ai rai yang, Madu Karai sharin shaga ai lam ni hpe madat mara ma ai. Shaloi jang she anhte gaw, Madu Karai a tsawra myit shang wang hta nga nga lu nna, ngwi pyaw ai lam hpe hkam sha lu na teng sha rai nga ai. Karai Kasang hte shut hpyit mara gaw arau sha n mai nga nga lu ai ngu ai hpe e anhte lu masam maram chye na ra nga ga ai. Shingrai mara hte mara de sit sa wa na lam ni hpe koi yen kau nna, lani the lani shinggyim masha jet hkra nga pra sa na grai a hkyak la nga ai majaw, dai zawn hkawm sa lu hkra anhte mung shakut sa ga law.
