Daini na Ja Chyum Mungga hpe hti sum ru yu ai shaloi e, anhte shada da tsawra nga na lam hpe tsun da nga ai. Tinang a jinghku wa a matu madu a asak hpe nawng kau ai du hkra ap nawng kau lu ai dam lada kaba ai tsawra myit n nga sai, nga ai Madu Yesu a sharin shaga ai lam hpe anhte sumru dinglik yu ga. Ndai tsawra ai myit hpe shinggyim masha ni gaw, tinang a magam bungli bungsi hte tsun dan ma ai. Kanu Kawa ni hte kashu kasha ni, kahpu kanau ni a lapran, tsawra ai ni a lapran hta, jet ai manang ni a lapran hta, ap nawng na matu, tinang a ahkaw ahkang ni hpe gwi gwi lu jaw ai ni nga nga ai.

Dai kaw e kanu kawa ni kaw nna, kashu kasha ni a ntsa tawn da ai tsawra myit gaw, hpa hpe mung ra marin ai lam n nga ai. Tinang a kashu kasha ni nga pyaw hkam ja na matu chyu sha yu kabu pyaw let tsawra nga ai kaba la dik ai chyeju nan rai nga ai.

Shingrai ya daini Madu Yesu tsun nga ai gaw, anhte ni hpa matut mahkai hkau chyap ai lam ni n nga tim pyi, anhte masha shada da tsawra matsan dum shawang myit nga let manu shadan hkat na matu ja ja tsun shadum nga ai. Madu Yesu shi hkum nan mung, shi a asak ap nawng kau ai du hkra masha shagu hpe tsawra manu shadan nga ai. N mai byin ai lam hpe Karai Kasang galaw shangun ai n rai nga ai. Karai Kasang gaw nahte hpe shadawn n nga, anhte yawng hpe tsawra nga ai. Ndai lam ni hpe sumru yu let, tinggyeng lahpawt ai myit masin hpe sharai let, mai kaja ai lam ni hta shakut sa ga law.