Paska laban manga ya ngu na Laban shani hta Sumsing lamu a hkaw hkam jan akyu hpyi ga tsun ai aten hta, Wa Sarabyin Leo gaw, Hkrung rawt ai lam a shingran hpe ,Hpang jahtum na Shana Shat Sha Poi a Kabu Gara Shiga hpe myit sumru yu ai. Yesu tsun ai “Nanhte a matu shara lajang na matu ngai sa wa na nngai,” ngu ai daw hpe lakap nna, Hkrung rawt ai lam gaw lai wa sai aten na myit tsang lam ni hpe myit mada shara de galai shai ya nna, kam sham ai ni a myit masin hpe shalan shabran lam hte asan sha chye na shangun ai lam hpe Wa Sarabyin ahkyak shatai tsun shaleng da nga ai.
Mungdan a Myit Masa Nnan: Wa Sarabyin Leo gaw, shingjawng hkat ai lam, shapraw kau ai lam, tingkyeng myit ni uphkang nga ai mungkan dingsa hpe Karai Kasang a Mungdan hte shadawn shadang tawn da ai. Mungdan hta manu dan dik ai lam gaw masha shagu lu la mai ai, langai hkrai masha wunawng wuwa hta sum mat na hta grau nna anhte a laklai ai masat kumla a matu lata la hkrum ai hpe myit yu shangun ai.
Makam Masham gaw lawt lu lam a Npawt Nhpang: “Nanhte a myit masin hpe hkum myit ru myit tsang shangun u” ngu ai Madu a matsun hpe tsun shaga ai shaloi, tengman ai makam masham gaw myit tsang lam kaw na lawt lu shangun ai lam Wa Sarabyin sang lang dan ai. Masha langai a sari sadang hte n htum n wai manu dan ai lam gaw, shinggyim wuhpawng hku nna masat masa galaw ai lam hta n-gun n rawng ai sha, Karai Kasang a makoi magap da ai lam hta madung tawn ai lam hpe ahkyak shatai tsun shaleng dan ai.
Mungkan ntsa sumsing lamu hpe myit mada ai lam: Wa Sarabyin gaw, simsa lam hte hpunau nauna myit gaw shinggyim masha ni a tengman ai shaga la ai lam re ai hpe madun dan ai hku nna, mungkan ntsa sumsing lamu hpe madun dan na matu Hkristan ni hpe saw shaga da ai. Ndai tsawra myit kata kaw, masha langai hte langai gaw, hpunau nauna ni a lapran hta, tinang a laklai ai masat dingsat hpe mu tam lu na re.
Wa Sarabyin Leo gaw, ndai simsa lam hte wuhpung wuhpawng hpaw hpawng ai lam a shiga hpe, Nu Maria hpe ap ya let, akyu hpyi ga hpe jahtum tawn ai. Hkristan hpung shagu gaw langai hkrai hpe myit tau ya ai hkap hkalum la ai nta tai wa lu na matu akyu hpyi ya nga ai.
