31. Karai Kasang a mungga gaw “asan sha rai nna, ding tawk re majaw, nawku hpung a lachyum shaleng ai lam mung, dai hpe shingdaw na ahkaw ahkang n nga ai. shanhte hte tsan gang hkra n re ai sha, shanhte sang lang dan mayu ai teng man ai lam ni hte matut mahkai lam hpe grau nna galaw ya ai.”
32. Kaja wa nga yang, shawng nnan na Hkristan hpung a shani shagu na sak hkrung lam hta, arung arai ni hpe garan gachyan ai hte matsan mayan ni hpe yu lanu lahku ai lam hpe asan sha mu lu ga ai. Grau nna gaida jan ni hpe shani shagu garum ningtum garan jaw ai lam hpe hparan ai ladat hpe bai dum mai nga ai (cf. Kasa 6:1-6). Ndai lam gaw loi ai manghkang n re, kaga mungdan kaw nna du sa ai ndai gaida jan nkau mi hpe maigan masha ni re majaw kalang lang yu lanu lahku ai lam nnga ai majaw mung rai nga ai. Kaja wa nga yang, Kasa Laika hta bai tsun dan ai mabyin gaw, htunghking hku nna Greek masha ni rai nga ai Yuda masha ni rai nga ai Hellenist ni a myit n dik ai lam langai ngai hpe madi madun nga ai. Kasa ni gaw, n-gun n rawng ai ga si ni hte n htang tsun ai sha, yawng hpe tsawra myit hpe madung tawn nna, gaida jan ni hpe garum shingtau ai lam hpe galaw nna, shanhte gaw Mungga hkaw tsun ai laman, shanhte lusha garan gachyan na matu kam hpa mai ai hpaji rawng ai hte hkungga ging ai masha ni hpe tam na matu, buga masha ni hpe garum hpyi ai lam hpe mu lu ai.
33. Pawlu gaw, gara hku mi rai rai, “kagat hkawm ai (sh) kaman lila hkawm ai” (Gal 2:2) n byin na matu, Kasa ni hpe bawngban na matu Yerusalem de sa ai shaloi, matsan mayan ni hpe n malap na matu (cf. Gal 2:10) hpyi shawn da ai. Dai majaw, matsan mayan nga ai buga masha ni hpe garum na matu, gumhpraw mahkawng da ai lam amyu myu hpe woi awn galaw wa masai. Pawlu ndai hku galaw ai lam a lachyum ni hta, lawu na lam ni dan dawng nga ai: “Karai Kasang gaw kabu gara ai myit hte jaw ya ai wa hpe tsaw ra nga ai” (2 Kor 9:7). Karai Kasang a mungga gaw, anhte hta na, n-gun n rawng ai, matsan mayan ni hpe gam jaw gam ya ai lam gaw, dai hpe galaw ai ni hpe teng sha akyu jaw ai lam hpe shadum ya nga ai: Karai Kasang gaw shanhte hpe laksan tsawra myit nga ai. Kaja wa nga yang, kaga masha ni hpe gam jaw gam ya ai ni hpe tsun ai ga sadi ni hte Chyum Laika hta hpring nga ai: “Matsan mayan ni hpe matsan dum ai wa gaw, Madu Karai kasang hpe hkoi ya nna, hkum tsup ai hku bai wa na ra ai” (Ga Shagawp 19:17). “Jaw mu, shaloi nanhte hpe jaw na marin dai… kaning rai nme law, nanhte jaw ai shadawn shadang hte maren, nanhte bai lu la na ra ai” (Lk 6:38). “Shaloi na a nhtoi gaw nhtoi htoi ai zawn htoi tu wa nna, na a shamai shatsai ai lam alawan tu pru na ra ai” (Is 58:8). Ndai lam hpe moi na Hkristan ni gaw kam shut ai lam n nga ai.
34. Chyum Laika, laika man ni hta tsun dan nna, Karai Kasang hpaw shadan dan ai mungga hku nna anhte hpe ap ya ai, shawng nnan na nawku hpung ni a prat hpe kasi la na matu kasi ningli langai hku nna jaw da ai raitim, tsawra myit hku nna bungli galaw ai makam masham a sakse langai hku nna mung, du wa na prat ban ni a matu ngang grin ai n-gun jaw lam langai hku nna mung jaw da nga ai. Tsaban law law laman, dai laika man ni gaw, Hkristan ni a myit masin hpe tsawra myit hte tsawra myit magam bungli ni hpe galaw na matu shadut ya ai majaw, asi si ai nli tum ni zawn, sut su ai dan la ai lam hpe galoi mung n jahkring kau ai.