Daini na Ja Chyum Mungga hpe hti sumru yu ai shaloi e, Chyoi pra ai wenyi yu hkrat wa na lam hpe na la lu ga ai. Ndai mungkan ga ntsa hta e hka bra ai ngu ai gaw, masha ni hpe myit n pyaw shangun ai lam rai nga ai. Madu Yesu mung daini shi pru mat wa ai majaw, Shi a Kasa ni myit n pyaw nna, ngam taw nga na hpe shi chye ai. Raitim mung shi sa wa yang sha Chyoi Pra Ai Wenyi Karai Kasang hpe, dat dat ya lu na rai nga ai ngu nna tsun nga ai. Ndai wenyi Karai Kasang a magam bungli ni hpe mung chyum mungga hta mu lu na rai nga ai. Shawng ningnan e Madu Yesu Karai hpe nyet kau ai.

Madu Karai hte tsan gang mat ai mara rai nga nna, Madu Yesu gaw, tengman ai lam rai nga ai ngu ai hpe asan sha chye lu na rai nga ai. Madu Yesu a si ai kaw nna bai hkrung rawt wa ai lam a marang e, mara hte si ai lam rai nga ai,Nat tsadan hpe dang kau lu ai lam, chyoi pra wenyi Karai Kasang gaw lam madun ya na rai nga ai. Daini na chyum mungga hta, Karai Kasang gaw shinggyim masha ni hpe matut mahkai ai lam galai shai mat ai hpe mu lu ga ai. Masha sa tai let matut mahkai nga ai kaw nna, bai hkrung rawt wa ai hpang e wenyi Karai Kasang hku bai matut mahkai ai ngu ai hpe mu mada lu ga ai. Karai Kasang a yaw shada ai lam rai nga ai chyoi pra ai wenyi Karai Kasang a lam madun ai. Sharin shaga ai lam ni hpe madat let hkan sa nga ga law.