Fatima Nu Maria a poi nhtoi hta, Wa Sarabyin Leo XIV gaw, Nu Maria a Nawku hpung hte ahkyak ai matut mahkai lam hpe madung tawn nna, General Audience hta tsun shaga lai wa sai. Lahkawng Lang Na Vatican Zuphpawng a laika ‘Lumen Gentium’ hpe la nna, shi a lit hpe madung ningmu masum hku nna tsun sang lang dan ai.
Hkum tsup ai kasi ningli: Wa Sarabyin gaw Nu Maria hpe Nawku hpung a “archetype” ningpawt ninghpang kasi ngu nna tsun da ai. Shi gaw Nawku hpung a shaga la ai lam a myit masa hpe madi shadaw ya nga ai: Chyoi Pra ai Wenyi hpe tsep kawp madat mara nga ai “num kasha makam masham” hte “kanu tsawra myit” hte wuhpung wuhpawng hpe madi shadaw ya nga ai.
“Kam sham ai wa ‘par excellence” hku nna, Nu Maria gaw Karai Kasang a makoi magap da ai lam hpe n-magap da ai sha hpaw tsun dan ai hte “Israela a shayi sha” langai hku nna tengman ai lam hpe mu lu ai majaw, nawku hpung kata na grau kaja ai num sha langai hku nna mu mada hkrum nga ai.
Kam sham ai ni a Kanu: Nu Maria gaw Hkristu hta kashu kasha ni hpe shaprat ya ai Nawku hpung ting a Kanu re ngu masat da hkrum nga ai. Wa Sarabyin gaw, makam masham hpung masha ni hpe “filial confidence” hte shi hpang de sit sa na matu, shi a makawp maga lam hte hpyi nem ai lam hpe tam na matu n-gun jaw ai.
Wa Sarabyin gaw, Nu Maria a sari sadang hpe “Mung sung lam a hkrang sumla rai nga ai numsha” ngu nna kadun dawk tsun da ai.
‘Num’ ngu ai ga si gaw shi hpe tengman ai labau lam hta ngang ngang jum da ya ai.
‘Icon’ ngu ai ga si gaw, Yesu hta hpaw shadan dan ai hkye hkrang la ai Karai Kasang a masing hpe Karai Kasang a chyeju hte shi hkum nan lawt lu ai myit hkrum ai lam (fiat) hpe madi madun nga ai.
Myit sumru na matu shaga ai
Wa Sarabyin Leo XIV gaw, makam masham hpung masha ni hpe, Nawku hpung hte anhte a hku hkau lam hpe jep joi yu na matu, “shagrit shanem ai hte shamu shamawt ai makam masham” hte shang lawm ai kun, Hkristu a grau sadi dung ai sape ni tai wa na matu, Nu Maria hpe lam madun ai wa hku nna yu nga ai kun ngu ga san san ai. Shi gaw, Nu Maria a akyu hpyi ga hku nna, kam sham ai ni yawng hta, “Chyoi Pra ai Kanu Nawku Hpung” hpe grau sung ai tsawra myit hta rawt jat wa na matu akyu hpyi ya let shi mungga hpe hpungdim da tai.
