CHAPTER THREE
A CHURCH FOR THE POOR
35. Shi Sarabyin lata ngut ai masum ya na ai hpang, nye a shawng na ningbaw wa gaw, matsan mayan ni hpe yu lanu lahku ai lam, Nawku hpung kata hta grau nna dan dawng hkra galaw mayu ai lam hpe shiga dap ni a dat kasa ni hpe tsun dan ai: “ Naw ku hpung gaw Matsan mayan rai nna, matsan mayan ni a matu rai nga ai hpe ngai ra sharawng nga n ngai”
36. Ndai ra sharawng ai lam hpe, Nawku hpung gaw “matsan mayan hkrum ai ni hta, shi a matsan mayan hkrum ai wa Hkristu a hkrang bung sumla hpe chye na ya ai” ngu ai chye na ai lam hpe madun dan nga ai. Kaja wa nga yang, Nawku hpung gaw, kaji dik htum ai ni hte htinglu htinglai na matu shaga la hkrum ai majaw, shi a npawt nhpang hta “dai shara hta, dai daram asan sha re ai shiga hpe n-gun yawm shangun ai, kam shut ai lam (sh) sang lang dan ai lam ni a matu shara n byin ging ai… Anhte a makam masham hte matsan mayan ni a lapran garan n mai ai matut mahkai lam nga ai hpe, n-gun jaw tsun dan ra ai.” Ndai lam hte seng nna, shaning hkying lahkawng daram na ai Hkristu a sape ni kaw nna sakse law law anhte lu ga ai.
Nawku Hpung a sutgan majing
37. San Pawlu gaw, n-nan shangai wa ai Hkristan hpung masha ni hta, “hpaji rawng ai ni, n-gun ja ai ni, hpung shingkang rawng ai ni law law n nga ai” (1 Kor 1:26) ngu ai hpe tsun dan da ai. Raitim, moi na Hkristan ni gaw matsan ai raitim, grau nna ra kadawn nga ai ni hpe yu lanu lahku ra ai lam hpe asan sha chye na ma ai. Hkristan makam masham a nhtoi htoi wa ai aten hta, Kasa ni gaw, buga hpung kaw na lata la hkrum ai masha marai sanit a ntsa e lata mara ya ma ai. Kade daram madang du hkra, shanhte a magam bungli hta shanhte hpe shinggyin la nna, matsan dik htum ai ni a magam bungli — Greek ga hku diakonía — a matu hpaw ninghtan da ma ai (cf. Kasa 6:1-5). Hkristu hpe kam sham ai lam hpe shi a sai ru kau ai du hkra shawng nnan sakse hkam ai sape gaw ndai hpung hta lawm ai Stehpan rai nga ai. Shi hta, matsan mayan ni hpe yu lanu lahku ai sakse hte, martyr byin ai sakse gaw kahkyin gumdin nga ai.
38. Tsaban lahkawng n du shi yang, kaga deacon langai mi, San Pra ai Lawrence mung, dai hte maren, Yesu Hkristu hpe sadi dung ai lam hpe, martyrdom hte matsan mayan ni hpe daw jau ai lam hpe, madun dan sai re. San Pra ai Ambrose a labau kaw nna, Wa Sarabyin Sixtus II a prat hta Roma mare hta deacon galaw ai Lawrence hpe, Roma asuya ni gaw, Nawku hpung a sutgan ni hpe nhtang jaw na matu, atik anang galaw shangun ai lam hpe chye lu ai. “Hpang shani hta matsan masha ni hpe shi hte rau woi sa wa ai, ga sadi tawn da ai sutgan ni gara kaw rai na kun ngu san ai shaloi, ‘Ndai ni gaw Nawku hpung a sutgan ni re’ ngu nna matsan masha ni hpe madun dan ai.” Ndai mabyin hpe tsun dan ai shaloi, San Pra ai Ambrose gaw: “Yesu hta shi hkum shi madun dan mayu ai sutgan ni hta grau manu dan ai sutgan ni gaw hpa rai ta?” Bai nna, Nawku hpung a magam gun ni gaw matsan mayan ni hpe bau maka ai lam hpe galoi mung n mai htingnut ai, grau nna shanhte a akyu a matu sutgan ni hpe mahkawng da ra ai hpe dum let, shi ndai hku tsun ai: “Ndai bungli hpe teng man ai makam masham hte hpaji rawng ai hku tau hkrau myit mada let galaw ra ai. bawng dung ai wa hpe hkye hkrang la nna, matsan dum ai amu galaw nga ai.”