Daini na Ja Chyum Mungga hpe hti sum ru yu ai shaloi e, Jau daju Yesu a akyu hpyi ga hpe na chye lu ga ai. Ya daini Madu Yesu gaw, sumsing lamu de mada yu let, Kawa Karai Kasang kaw akyu hpyi nga ai. Shi hkawm na udang lam hpe chye ai majaw, ndai lam hta Kawa Karai hpe arau nga shangun mayu nga ai. Shi si hkam ai hpang bai hkrung rawt ai a marang e, hpung shingkang dan hkung na matu, Kawa Karai kaw akyu hpyi nga ai. Madu Yesu gaw Kawa Karai Kasang a myit ra ai hpe Udang ntsa si hkam ai kaw du hkra, madat mara let hpung shingkang hpe shadan shadawng nga ai.

Dai hta sha n ga, Madu Yesu shi tsawra ai shi a Kasa ni a matu mung akyu hpyi ya ai hpe mu lu ga ai. Shi sumsing lamu de bai lung wa ai shaloi e, Kasa ni myit hkrum ai hte nga nga na matu mung shi ja ja akyu hpyi ya nga ai. Dai zawn sha shiga madat nga ai ni anhte yawng mung, akyu hpyi ai shaloi e tinang a matu chyu sha hpyi la ai hku n re ai sha, Karai Kasang a matu ap nawng daw jau lu na matu mung anhte akyu hpyi chye ra ga ai. Dai sha n rai, Nawku hpung ting a matu mung myit hkrum rap ra gahkyin gumdin na lam a matu mung tut e kyu hpyi ya na lit magam anhte yawng kaw nga nga ai re hpe myit dum let  hkan sa nga ga law.