Daini na Ja Chyum Mungga hpe hti sum ru yu ai shaloi e, Yesu hpe Kasa Petru nachying tsawra nga ai lam na lu ga ai. Karai Kasang a tsawra ai wan shinglet gaw, na a masin salum kata hta tu grung nga nga ai kun? Karai Kasang gaw tsawra myit madung rai nga ai. Shi a tsawra myit mung shadawn hpa n nga ai dinggrin anga nga ai. Ya daini Madu Yesu gaw Kasa Petru hpe shi hpe tsawra nga ai i nga nna, hpa majaw masum lang pyi san nga a ta? Madu Yesu hpe masum lang pi n chye nngai ngu nna ningdang kau ai Petru hpe kaja wa sha lam shagu hpe tawn kau da nna, Karai a amyu masha ni a matu Sagu rem wa kaja teng sha byin lu na matu san ai rai nga ai.

Bai kaga masha ni hprawng kau da tim pyi shi galoi e mung n hprawng kau da ai nga nna, tsun shakawng chye ai Petru hpe sadi jaw mayu ai mung rai na re. Shi masum lang tsun ai hta, shagrit shanem ai hte ngai nang hpe tsawra ai nang chye ndai ngu grai yawn ai hte Petru bai htan dat nu ai. Anhte ni ninggun yawm nga tim, shut hpyit mara lu nga tim, Karai Kasang gaw anhte hpe arai mahkra hta shi hpe grau tsawra nga na matu saw shaga nga ai. San pra ai Augustine tsun ai, Karai Kasang hpe shi tswra ai grai hpang hkrat mat sai nga hkam la nu ai. Oh Wa Karai Kasang e anhte a myit masin salum ni hpe nang Madu a tsawra ai hte shagrung ya rit. Anhte n chye tsawra ai. Bai matsan dum n chye ai, chyeju n dum chye ai myit ni, n san seng ai lam ni, nang Madu a ra sharawng ai lam ni hpe ningdang lale kau ai lam ni mahkra hpe la kau ya rit law Madu Karai Kasang e. Amen.