Ninghtoi May 17, 2026 ya, Laban shani, Madu Yesu Lamu De Lung Wa ai Poi Ninghtoi hta Laudato Si’ Ramma Missa Hkungga hpe hkying 10:00 AM aten, San Columban Cathedral Nawku Jawng hta galaw la lu sai.
Missa Hkungga hpe Wa Jau Lahpai Myu Jat Awng @ Kurt (Columban Jau) kaw nna, woi awn nawngjau ya sai rai nga ai. Missa Hkungga hta Jau Ginwang shagu na Ramma ni hte Nawku Hpung masha ni sa du shang lawm sai rai nga ai.
Laudato Si’ a Yaw shada ai lam gaw Karai Kasang Hpan Tawn Da ai lamu ga, hpun kawa, hka shi hka nu, dusat dumyeng ni hte Karai Kasang a Ta Maka yawng hpe tsawra chye na matu, makawp maga chye na matu rai nga ai.
Missa Hkungga hta San Columban hpang de akyu hpyi ai hte Lamu ga, Wan, Nbung, Hka, Hpun/Nampan, Mali Hka Wudang(mali hka ginra kaw na hpun kawa hte galaw ai) ni a matu lak san akyu hpyi ai lam hpe galaw ai rai nga ai. Dai hta,
- Lamu ga gaw “ anhte hpe hkai lu hkai sha lam, asak hkrung lam, lu sha hte hpan da ai lam a matut mahkai ai lam ni hpe shadum ya ai” rai nga ai.
- Wan gaw “Karai Kasang nga ai lam, jasan jaseng ai lam, nden marai hte myit mada lam a nhtoi hpe madun dan ai.” rai nga ai.
- Nbung gaw “ anhte hpe nsoi nsa, Wenyi, lawt lu ai lam hte asak hkrung lam a matut mahkai ai lam ni hpe shadum ya ai.” rai nga ai.
- Hka (Mali hka hpe yaw shada let) “hka gaw asak jasan jaseng ai.kashin kamun hkam la ai hte Karai Kasang a n-gaw n-wai ai chyeju hpe hkarang shapraw ai.”rai nga ai.
- Hpun/Nampan gaw “dusat amyu myu, htawm hpang prat ni hta, hkam sharang lu ai atsam, bai hkrung rawt wa ai lam ni hpe hkrang shala ai.”rai nga ai.
- Mali hka wudang “Mali hka Wudang gaw, Kachin State a lamu ga hte hka nu ni hta ru jung nga ai makam masham a kumla rai nga ai. Hkrisatu gaw masha ni hte rau hkawm sa nga ai lam, yawn hkyen hkrum nga ai ni hte rau hkawm sa nga ai lam hte hpan da hkrum ai yawng mayawng hte rau hkawm sa nga ai lam hpe myit dum shangun ai.”lam ni rai nga ai.
- San Columban gaw “Sasana sara ni a makawp maga ai wa hte shingra tara hte seng ai Wenyi lam gaw, anhte hpe nden ja ai myit, asan sha re ai lam, hpan da ai lam hte hkunghkying hpe hkungga ai lam hte hkawmsa na matu n-gun jaw ai.”rai nga ai.
