Daini gaw, A Lifetime of Love, Tsawra ai Gaw Prat Tup a Matu Rai Ngai Ai ngu ai hpe jawm myit sumru nna akyu ga, ngu nna saw mayu ai.
Anhte gaw sumsing mungdan a matu asak hkrung nga ga ai. Masha hkum shagu gaw “tsawra ai hpe hkam la mayu ai hkrai rai nga ai”. Dai majaw Wa Karai mung, shi anhte hpe kade daram tsawra nga ai ngu ai hpe, anhte n chye ai lani mi pyi n shalai kau shangun mayu nga ai.
Yawhan jahku (15:9) hta,
“Wa gaw ngai hpe tsawra ai zawn, ngai mung nanhte hpe tsawra made ai: nye a tsawra ai hta maju jung nga mu” nga nna Madu Yesu anhte hpe saw nga ai.
Anhte gaw mayam ni a sai, salat, myi-prwi si hte gaw gap da ai mungdan hte n seng ga ai; Grau htum ai Hkawhkam wa a wunma ni, shi a kaba la ai tsawra myit hte ap nawng da nna lu la ai mungdan hta she, lawm nga ga ai. Wa Karai Kasang anhte hpe kade daram tsawra nga ai ngu ai hpe anhte chye wa nna, bai nhtang tsawra lu na matu, Hkye La Madu Yesu gaw shi a asak hpe kabu sharawng awng ai myit hte ap nawng kau ya sai. Dai majaw, Yawhan (15:9) hta shi tsun ai,
“Wa gaw ngai hpe tsawra ai zawn, ngai mung nanhte hpe tsawra made ai: nye a tsawra ai hta maju jung nga mu. Ngai gaw nye Wa a ga matsun hkan shatup nna, shi a tsawra ai hta maju jung nga nngai zawn, nanhte mung nye a ga matsun hkan shatup myit yang gaw, nye a tsawra ai hta majung jung na myit dai.
Nye a kabu gara ai myit nanhte hta rawng nga na hte nanhte a kabu gara ai gaw hpring tup wa na matu, ga ndai ngai nanhte hpe tsun da made ai. Ngai nanhte hpe tsawra made ai zawn, nanhte shada da tsawra nga mu, dai gaw nye a ga matsun rai li ai. Jinghku wa a matu tinang a asak nawng kau hkra tsawra ai myit hta, grau kaba ai tsawra myit gaw kadai hta mung n rawng nga ai” nga ai.
Dai majaw, Sumsing mungdan a matu asak hkrung ai ngu ai gaw- Wa Karai kaw na – ding-yang agalaw nga nna, mu mada lu ai tsawra ai amu ni hta shakut hkan sa ai lam rai nga ai. Shaloi she, anhte hkum-nan shamai shatsai ai hkrum nna, kaga masha ni hpe mung, tsawra ai hpe madun dan lu nga ai. Madu Yesu gaw Tara lam ni mahkra hpe – Karai Kasang hte tinang a htingbu wa hpe tsawra ai lam lahkawng hta gumhpawn shajup bang kau nga ai.
Karai Kasang a Tara lam ni hpe anhte madat mara na rai yang, sumsing mungdan lam a mu-jut hku yu chye ra ga ai. Yawhan a shagun laika langai, (1 Yawhan 4:7) hta shi tsun ai,
“Tsawra ai ni e, anhte shada da tsawra nga ga: tsawra ai myit gaw, Karai Kasang kaw na rai nga ai rai nna, tsawra ai myit rawng ai wa kadai rai timung, Karai Kasang kaw na shangai wa sai hte, Karai Kasang hpe chye chyang nga ai.” Mungkan a lam hku she anhte hkan na rai yang gaw, tingkeng myit jasat rawng na, wai mat lu ai lam ni hpe hkan shachyut nna, sawt ai tsawra myit hte sha masha ni hpe kanawn na rai nga ai.
Sumsing mungdan a lam hpe hkan na rai yang gaw, Karai kasang e shaprat ai kasha tai hkra, shani shagu, Karai Kasang hpe chye chyang wa lu hkra, “yes” “maisa” ngu ai mahtai jaw let shakut na rai nga ai.
(1 Yawhan 4:19) hta gaw, “Shi gaw shawng nnan e anhte hpe tsawra mi ai majaw, anhte mung, tsawra nga ga ai” nga nna bai tsun da ai.
Dai majaw, sumsing mungdan a matu asak hkrung mayu ai rai yang, Karai Kasang anhte hpe tsawra ai hpe shawng hkam la chye ra ai. Dai hte shawng hpang ra ai; Shi a tsawra ai hta anhte a prat hpe galai shai la, hkye mawai ai hpe hkam la, shamai shatsan ai hpe hkam la rai ra ga ai. Anhte yawng gaw, Wa karai a tsawra ai hte shamai shatsai ai hpe hkam la ra ai wunma ni kap ai hkrai rai ga ai.
Wa Karai a tsawra ai hpe anhte shawng n chyim yu, n hkam la ai rai yang, tinang a hkum hpe ningdang kau nna kaga masha ni hpe tsawra na matu n mai byin nga ai. Chyoi Pra ai Wenyi a galai shai kau ya lu ai chyeju atsam hpe man man n hkam la ai ni gaw tinang hkum hpe rai dum ai, myit tsaw myit-dap ai madang kaw sha naw nga nga ma ai.
Ya, asim sha bai nhtang sumru akyu hpyi ga.
- Sumsing Lamu na na a Kawa Karai a tsawra ai hpe hkam la na matu aten la u.
Yawhan (15:9) hpe madat yu ga,
“Wa gaw ngai hpe tsawra ai zawn, ngai mung nanhte hpe tsawra made ai: nye a tsawra ai hta maju jung nga mu.”
- Karai Kasang nang hpe tsawra ai hpe hkam la na hte nang hkum-nan kaga masha ni hpe tsawra lu na matu dingbai dingna jaw ai lam ni gaw hpa lam ni rai kun? Sumru yu u.
- Kaga masha ni hpe na hkum hpe nang tsawra ai zawn tsawra lu hkra Chyoi Pra ai Wenyi gara hku garum mai ai kun?
Kadai wa chyeju hte mara raw dat ya ai hpe ra nga ai kun? Shada da htingrai htingrat ai hte myit mada ai lam hpe ra nga ai manang ni kadai rai kun?
San Yawhan anhte hpe shadum ai gaw,
“Tsawra ai ni e, anhte shada da tsawra nga ga: tsawra ai myit gaw, Karai Kasang kaw na rai nga ai rai nna, tsawra ai myit rawng ai wa kadai rai timung, Karai Kasang kaw na shangai wa sai hte, Karai Kasang hpe chye chyang nga ai” (1 Yawhan 4:7).
Hpunau ni e, Hpan Madu Karai hpe tsawra ai hte tinang a htingbu manang ni hpe tsawra ai gaw lani mi, Shata mi, a matu sha n rai; anhte a sak hkrung prat tup sumsing mungdan Wa Karai a shang-wang de du shang wa ai aten du hkra rai nga ai law.