Wa Karai Kasang anhte a sak hkrung lam a matu, Shi myit ra sharawng ai lam ni hpe chye lu na matu anhte a myit hte salum ni hpe hpaw da nna shi jaw ya na kabu gara ai hpe hkam la ga. Daini anhte jawm sumru akyu hpyi na lam gaw, Heaven On Earth, Dinghta Ga Na Sumsing Lamu Mungdan ngu ai rai na re.
Wa Karai Kasang gaw, Shi a Sumsing Mungdan hpe anhte a Dinghta Ga ntsa de mung chyam bra mat wa shangun mayu nga ai. Dai lam hpe anhte hku nna shi galaw mayu nga ai.
Mahte (6:9-13) hta Madu Yesu anhte hpe sharin ya ai,
“Sumsing lamu na anhte a Wa e, Na a amying ningsang chyoi pra nga lit ga; Na a mungdan du wa ru ga; Lamu tang hta na a myit dik nga ai hte maren ga ntsa e mung dik wa lit ga law; shani shanang anhte hta ra ai lusha, dai ni anhte hpe jaw mi; masha ni anhte hpe shut ai mara, anhte raw kau ya ai zawn, anhte a mara hpe mung raw kau ya mi; agung alau nga ai de, anhte hpe n sa shangun ai sha, N kaja ai lam hta na, shaw la mi law.”
Dinghta Ga ntsa e Karai kasang a Mungdan du wa ru ga ngu nna hpyi ai gaw – Wa Karai anhte hte shanu nga ai, anhte ra ai lam ni hpe jaw ya ai, shi a tsawra ai, hkye mawai la ai lam ni hpe anhte ra kadawn dik rai nga ga ai hpe ndau shana ai lam rai nga ai.
Hkawhkam ni a Hkawhkam Wa nan, anhte hpe ahkyak dik htum ai lit shatsam dat sai: anhte du hawm mat wa ai shara shagu de Karai Kasang a Mungdan hpe gun hkawm nna, anhte galaw sa wa ai lam magup hku nna shachyam shabra ra ga ai. Sumsing lamu hpe ginding aga de shayu na matu Madu Yesu anhte hpe shaga la sai.
Mahte (16:19) hta Yesu, Kasa Petru hpe tsun ai lam langai mi hpe madat yu ga,
“Sumsing lamu na mungdan a sumsaw ni ngai nang hpe ap ya na de ai rai nna, dinghta ga hta nang gyit da mada gaw, sumsing lamu hta mung gyit da ai hkrum na ra ai; dinghta ga hta nang raw maraw gaw, sumsing lamu hta mung, raw kau ai hkrum na ra ai.”
Karai Kasang a Amyusha ni sumsing mungdan hpe shanhte du hkawm mat wa ai shara shagu de shachyam shabra dat na ngu ai gaw kaning re ai hpe ngu ai kun?
Mungga madat nga ai ni (n law tim) anhte sha pyi, Karai Wa a shaga ai nsen hpe madat la nna, mungkan a tang pyaw lam ni, nga mu nga mai ai lam ni, anhte a shim lum ai lam ni kaw nna pru nna sumsing mungdan a mahkrun hku jawm hkawm sa ai rai yang, kaning san na kun?
Nang, ngai, anhte langai hpra gaw, anhte myit sawn lu ai hta grau kaba ai magam bungli ni hpe galaw lu na matu, hpan da hkrum saga ai. Shi gaw anhte a kata e, sumsing mungdan a chyinghka ni hpe hpaw lu na zaw ni hpe bang da ya sai. Dai hte, shi a tsawra ai, chyeju ni, saimsa ai, matsan dum lama ai hte hkye hkrang la ai chyeju ni hpe, ra kadawn dik rai nga ai masha ni hpe jaw ya na matu anhte hpe shi lang mayu nga ai.
Shi gaw nang hpe, na a shani shagu galaw nga ai mahkrun ni kaw nna shaga shaw la nna, dai hta grau tsaw ai, shi a mai kaja ai chyeju atsam hte Mungkan ga hpe galai shai kau ai, mahkrun hpe madun mayu nga ai.
Dai hpe galaw lu na matu tinang kaw nna hpang ra nga ai; tinang a kata kaw nna galai shai ai lam hpe hpang ra ga ai. Dai bungli hpe tinang a atsam hte n rai, Karai Kasang a chyeju atsam hte sha, rai nga ai.
Anhte hkan galaw ra na gaw -Karai Kasang a tsawra ai hpe hkam la na, tinang hkum hpe shi a salum hta rawng ai lam ni hte jahpring la na, dai shi ra sharawng ai lam ni byin wa hkra shi a woi awn lam madun ai hpe hkam la na sha ra nga ai.
Ga shadawn, Karai kasang gaw nang lu ai muk tawng manga hte nga jahkraw lahkawng hpe la nna masha “hking” “mun” hpe jaw sha mayu nga ai. Chyoi Pra ai Wenyi hte rau gin-run nna, Mungkan ga hpe lu galai shai kau lu hkra, “nang hpe Karai kasang jai lang hkra” na a prat hpe shi kaw ap da u.
Ya, anhte asim sha nga nna bai sumru akyu hpyi ga.
- Karai Kasang a mungdan hpe dinghta ga de woi shang na matu anhte hpe shaga la sai ngu ai hpe sumru yu ga.
Mahte daw kaba shi-kru: kaji shi-jahku (16:19) hta Madu Yesu tsun da ai hpe bai dum ga,
“Sumsing lamu na mungdan a sumsaw ni ngai nang hpe ap ya na de ai rai nna, dinghta ga hta nang gyit da mada gaw, sumsing lamu hta mung gyit da ai hkrum na ra ai; dinghta ga hta nang raw maraw gaw, sumsing lamu hta mung, raw kau ai hkrum na ra ai.”
- Karai kasang gaw shi a mungdan hpe shachyam shabra dat na matu anhte hpe jaw da sai zaw gaw hpa rai kun? Kaning re ai Chyoi Pra ai Wenyi a kumhpa nang hpe jaw da sata? Nang, kaga mashsa ni hpe gara lam ni hku nna tsawra myit hpe grau madun dan lu a ta? Lai sai aten hta Karai Kasang nang hpe gara hku asun jashawn lai wa sata?
- Sumsing mungdan hpe Mungkan ga de gara hku shadu lu na lam Chyoi Pra ai Wenyi nang hpe sharin ya na matu Shi kaw hpyi u. Nang kaga masha ni a ntsa chyeju hte ru bun ya lu hkra, nang hpe shawng chyeju hte jahpring ya na matu shi kaw hpyi u. Karai Kasang hte kaga masha ni hpe tsawra ai lam hpe pat shingdang da ai shakum/nhpan ni hpe hpra, run kau ya rit ngu nna shi kaw hpyi u.
Sumsing mungdan hpe dinghta ga ntsa de shayu na matu Karai kasang e shaga lam ai lam gaw – Hkristan ni a matu shani shagu hkan galaw ra ai bungli ni a daw chyen rai nga ai; rai tim, tsaw dik, ahkyak dik rai nga ai. Hpa lam ni hpe anhte galaw ga tim, dai lam ni hku nna sumsing mungdan hpe dinghta ga de la sa na hpe Wa Karai ra sharawng nga ai.
Mungga madat nga ai ni yawng mung, sumsing mungdan dinghta ga ntsa e dik wa sai hpe mu mada lu, hkam sha lu myit ga law.
Yawng hpe Wa Karai shaman ya u ga!
By Charles Cardinal Bo