Daini na Ja Chyum Mungga hpe hti sum ru yu ai shaloi e, Myikyaw ai wa Batime-u a lam hpe na la lu ga ai. Shiga madat nu wa ni, na a prat hta prat tup a matu akyu rawng ai n mai shalai kau ai ahkaw ahkang ni hte hkrum katut ga sai kun? Dai zawn re ai ahkaw ahkang daini na chyum laika hta e, matsan jam jau nna, myi n mu ai wa Batime-u hkrumkatut ngaai. Shi a makau e lai wa ai Yesu ngu ai wa a mying gumhkawng ai lam, shi tsi shamai ya lu ai lam hpe n mu lu tim, na ga sai. Dai majaw n dai ahkaw ahkang hpe n kam shalut kau mayu ai.

Shingrai atsam marai hpring hte ning gun la let, Yesu shi hpe chye lu hkra n hkring n sa marawn nna garum hpyi taw ai rai nga ai. Madu Yesu kaw hkan nang ai ni hte, makau kaw nga nga ai ni mung shi hpe jawm jahkring ai lam, n galaw ma ai. Hpang jahtum e Madu Yesu a tsi shamai ya ai hpe hkam la lu nna, myi bai mu lu nga sai re. Anhte a prat hta e mung, tinang a matu ra kadawn dik ai lam, prat hta n nga nan n mai ai lam gaw hpa ni rai a ta? Ndai lam hpe mung asan sha chye na grai ra a hkyak nga ai. Madu chye ai hte rau makau grupyin kaw na tsun jahpyak ai nsen ni, ninghkap pat shingdang ai lam ni hpe mung tawt lai kau nna, tinang hpe chyeju jaw ya nga ai, Karai Kasang hpe chyu sha myit dating let hpyi ai rai yang, kaja wa teng sha lu na re ai lam hpe daini na kabu gara shiga gaw anhte a matu sakse rai nga mali ai.